Շաբաթ Բեռլինում կայացած Եվրոպական կինոակադեմիայի (European Film Awards) մրցանակաբաշխության արարողությանը ռեժիսոր Լարս ֆոն Տրիերի «Մելանխոլիա» ֆիլմը ճանաչվել է տարվա լավագույն ֆիլմ: Այս մասին հաղորդվում է կինոակադեմիայի պաշտոնական կայքում:
Հիշեցնենք, որ Կաննի կինոփառատոնի ժամանակ սկանդալ էր բռնկվել Լարս ֆոն Տրիերի շուրջ, երբ վերջինս իր համակրանքն էր արտահայտել Հիտլերի նկատմամբ, որից հետո հայտարարվել էր «պերսոնա նոն գրատա»: Դրանից հետո նա բազմիցս գրավոր և բանավոր ներողություն էր խնդրել, ընդ որում՝ նրա առանձին «մեղայական» խոսքեր միանշանակ չէին մեկնաբանվել լրագրողների կողմից, որից հետո ռեժիսորը երդվել էր այլևս չշփվել լրագրողների հետ:
Բեռլինում ռեժիսորը ներկա չի եղել: Նրա ներկայացուցիչը, բեմ բարձրանալով, ասել է, որ Լարսը «խնդրել է ժպտալ և հնարավորինս բարեկամաբար բոլորին ձեռքով անել»:
Լավագույն օպերատորական աշխատանքի համար մրցանակ է ստացել «Մելախոլիայի» օպերատոր Մանուել Ալբերտո Կլարոն, իսկ նույն ֆիլմում աշխարհի վերջի կադրերը պատկերելու համար մրցանակ է շնորհվել նկարիչ Յետտե Լեմանին:
Լավագույն դերասանուհի է ճանաչվել օսկարակիր Թիլդա Սուինթոնը «Մենք պետք է խոսենք Քևինի մասին» (We Need to Talk about Kevin) ֆիլմում մարմնավորած դերի համար: Դերասանուհին ներկա չի եղել, մրցանակը վերցրել է պրոդյուսերը:
Կինոփառատոնին ներկա չի գտնվել նաև Քոլին Ֆերտը, որը մրցանակ է ստացել «Թագավորի խոսքը» (The King’s Speech) ֆիլմում մարմնավորած դերի համար: Այս ֆիլմը ստացել է ևս երկու մրցանակ՝ հեռուստադիտողների ինտերնետ-քվեարկության արդյունքներով (People’s Choice Award) և լավագույն մոնտաժի համար:
Եվրո-Օսկարի լավագույն ռեժիսոր է ճանաչվել Սյուզաննա Բիրը՝ In a Better World ֆիլմի համար, լավագույն վավերագրական ֆիլմ՝ Պինա Բաուշին նվիրված Pina ֆիլմը:
Լավագույն կարճամետրաժ ֆիլմ անվանակարգում մրցանակ է ստացել սկսնակ ռեժիսոր Տերրի Քիլիամը՝ The Wholly Family ֆիլմի համար: Լավագույն սաունդթրեք անվանակարգում մրցանակ է շնորհվել Լյոդովիկ Բուրսին Միշել Խազանավիչյուսի The Artist ֆիլմի համր: Լավագույն երկարամետրաժ անիմացիոն ֆիլմ է ճանաչվել Տոննո Էռանդոյի, Խավիեր Մարիսկալի և Ֆերնանդո Տրուէբայի Chico&Rita ֆիլմը՝ Հավանայում 50-ականների ջազի և սիրո մասին:
Կինոկարիերայի համար պատվավոր մրցանակ են ստացել բրիտանացի ռեժիսոր Սթիվեն Ֆրիրզը և դանիացի դերասան Մեդս Միքքելսոնը:
Բացի այդ, այս տարի շնորհվել է հատուկ պատվավոր մրցանակ, որը բաժին է հասել ֆրանսիացի դերասան Միշել Պիկոլիին: Այս մրցանակն ամեն տարի չի շնորհվում: Վերջին անգամ այն շնորհվել է 2008 թ. լեգենդար պորտուգալացի Մանուել դե Օլիվեյրին, որն այդ ժամանակ դառնում էր 100 տարեկան:
