Ռազմավարական և ազգային հետազոտությունների հայկական կենտրոնի ղեկավար Մանվել Սարգսյանը չի կարծում, որ դեկտեմբերի 4-ին Ռուսաստանում կայանալիք խորհրդարանական ընտրությունները որակական փոփոխություններ մտցնեն այդ երկրի վարած արտաքին քաղաքականության մեջ: Նման տեսակետ նա հայտնեց «Առաջին լրատվական»-ի հետ զրույցում:
Հարցին՝ կիսո՞ւմ է այն տեսակետը, որ Հարավային Օսիայում անցկացված նախագահական ընտրություններում ընդդիմադիր Ալլա Ջիոևայի գրանցած հաջողությունները և Ռուսաստանի հովանավորությունը վայելող Անատոլի Բիբիլովի պարտությունը վկայում են Կրեմլի ձախողված քաղաքականության մասին՝ փորձագետը նկատեց. «Ո՛չ, չեմ կարծում, որ նման բան կա: Կրեմլը նույն գիծն է պաշտպանում, ինչ որ միշտ, նոր մոտեցում դեռևս ցույց չի տրվել: Միաժամանակ չեմ կարծում, որ Հարավային Օսիայում նախագահական ընտրությունների արդյունքներն ինչ-որ կերպ ազդեն Ռուսաստանի վարած քաղաքականության վրա»,- ամփոփեց փորձագետը:
Հիշեցնենք, որ Հարավային Օսիայի Գերագույն դատարանը չեղյալ է հայտարարել կիրակի օրը այդ երկրում տեղի ունեցած նախագահական ընտրությունների երկրորդ փուլը, որի նախնական արդյունքներով ընդդիմադիր թեկնածու Ալլա Ջիոևան հավաքել էր քվեների 56.7 տոկոսը, իսկ Ռուսաստանի հովանավորությունը վայելող Անատոլի Բիբիլովը՝ քվեների 40 տոկոսը։
Գերագույն դատարանն իր այս որոշումը պատճառաբանել է ընտրախախտումների առկայությամբ։ Այժմ երկրորդ փուլի կրկնակի ընտրությունները պետք է անցկացվեն երկու ամսվա ընթացքում։
Սակայն ուշագրավն այն է, որ այս անգամ Ալլա Ջիոևան այդ ընտրություններին մասնակցելու իրավունքից զրկվել է, քանի որ դատարանն անցած ընտրությունների ժամանակ ընտրախախտումներ է հայտնաբերել հենց նրա կողմից։ Ջիոևայի համակիրները դա որակել են որպես իշխանության բռնազավթում։
Հիշեցնենք նաև, որ Ալլա Ջիոևան նոյեմբերի 30-ի գիշերն իրեն հռչակել էր Հարավային Օսիայի նախագահ և որպես առաջին քայլ այդ պաշտոնում՝ ձևավորել պետխորհուրդ։
