Այսօր Երևանում մեկնարկեց հայ-թուրքական երկօրյա գործարար համաժողովը: Թուրքիայի տարբեր մարզերից ժամանել են 50-ից ավելի գործարարներ: Համաժողովի մասնակիցները 1 րոպե լռությամբ հարգեցին Վանի երկրաշարժի զոհերի հիշատակը:
Հայաստանի արդյունաբերողների և գործարարների միության նախագահ Արսեն Ղազարյանը կարևորեց այն փաստը, որ տնտեսական բավական ծանր պայմաններում թուրք գործարարները ժամանել են Հայաստան:
«Սա վկայում է, որ երկու երկրների գործարարները շարունակում են հետաքրքրություն ցուցաբերել տնտեսական կապերի զարգացման ուղղությամբ»,- ասաց Ղազարյանը` հույս հայտնելով, որ Թուրքիայի քաղաքական ղեկավարությունը կհասկանա իր շահերը և կբացի սահմանը:
Հայ-թուրքական գործարար խորհրդի (TABDC) համանախագահ Նոյան Սոյաքը նշեց, որ հայ-թուրքական սահմանը փակ է, բայց նույնիսկ այդ դեպքում հասել ենք 300 միլիոն դոլար առևտրի: Ըստ նրա` ժամանակի ընթացքում այս թիվը կեռապատկվի:
Այսօր Հայաստանում կան թուրքական խանութներ, և Սոյակը հույս հայտնեց, որ երբևէ Թուրքիայում էլ կլինեն հայկական խանութներ:
«Հայկական համարանիշներով մեքենաները օգոստոսից սկսել են մուտք գործել Թուրքիա: Նման զարգացումները մեզ շատ են ուրախացնում»,- հայտարարեց Սոյաքը:
