Օրերս մամուլում տարածված տեղեկությունների համաձայն, ԴԱՀԿ ծառայության պետ Միհրան Պողոսյանը՝ Քեթրինի Միհրանը, վաճառել է մրգերի իր պահեստները Հայաստանում և արտերկրում:
Բանն այն է, որ մինչ այս Քեթրինի Միհրանը ցիրտրուսային մրգերի ներկրման շուկայում մենաշնորհ դիրք ուներ և նրան պատկանող «Քեթրին գրուպ» ընկերությունն էլ զբաղվում էր մրգերի ներկրմամբ, սակայն, ըստ որոշ տեղեկությունների, նրան այդ դիրքից «գահընկեց» են արել: Իսկ դա արել է Սերժ Սարգսյանի եղբայրը` ԱԺ պատգամավոր Սաշիկ Սարգսյանը:
Սաշիկ Սարգսյանն է հիմա համարվում ցիտրուսային մրգերի խոշոր ներկրողը. նա դաշտից դուրս է մղել ոչ միայն Քեթրինի Միհրանին, այլև անգամ նրանց, ովքեր փոքր «խմբաքանակով» էին միրգ ներկրում, իրացնում այն՝ խթանելով փոքր և միջին բիզնեսի կայացմանը:
Արդեն մի քանի ամիս է, ինչ մնացյալ՝ փոքր «խմբաքանակով» ներկրողները հայտնվել են անելանելի վիճակում: Նրանց պարզապես սահմանին չեն սպասարկում, արհեստական խոչընդոտներ են ստեղծում՝ ապրանքը չմաքսազերծելու և այն փչացնելու նպատակով:
Հիշեցնենք, որ անցյալ տարի դեկտեմբեր ամսին ըստ շրջանառվող ու առայսօր չհերքված լուրերի` Միհրան Պողոսյանն իր աշխատասենյակում թիկնապահների միջոցով ծեծի էր ենթարկել ԱՆ ԴԱՀԿ ծառայության անձնակազմի կառավարման բաժնի պետ Ռուբեն Միրաքյանին ու ազատել աշխատանքից:
Արդարադատության նախարար Գևորգ Դանիելյանն այդ միջադեպից հետո պաշտոնանկ արվեց` ԴԱՀԿ պետին չպատժելու համար: Առայսօր որևէ մեկը այդպես էլ չի կարողացել մեկնաբանել, թե ինչու Միհրան Պողոսյանին չպատժելու համար պատժեցին Գևորգ Դանիելյանին, բայց ահա Միհրան Պողոսյանը շարունակում է պաշտոնավարել:
Իշխանական դաշտում կարծիք կա, որ ծնունդով ղարաբաղցի Միհրան Պողոսյանը համարվում է այս կլանային-օլիգարխիկ համակարգի կարևորագույն օղակներից մեկը և անկախ արարքներից` անձեռմխելի է: Նա շատ մտերիմ է Սերժ Սարգսյանի թիկնազորի պետ Վաչիկ Ղազարյանի հետ: Թեև Քեթրին Միհրանը հայտնի չէ հասարակական լայն խավերին, սակայն Հայաստանի ամենահարուստ մարդկանցից մեկն է: Նրան է պատկանում ոչ միայն «Քեթրին գրուպ» ընկերությունը, «Քեթրին» տաքսի ծառայությունը, «Ֆրեշ» սուպերմարկետների ցանցը, որն առաջիկա օրերին վաճառվելու է «Սթար» սուպերմարկետների ցանցին, երկաթե կոնստրուկցիաներ արտադրող «Միկ-Մետալ» գործարանը, «Երազ» գործարանը, «Երազ» բնակելի թաղամասը, «Գրիառ» ռեստորանը:
Միհրան Պողոսյանի անվան հետ ուշագրավ պատմություն է կապվում. նրա մորեղբայրը ԱԱԾ պետի նախկին տեղակալ Գրիգոր Հարությունյանն է: Հենց Հարությունյանի շնորհիվ էլ Միհրանը նախ` ԶՈՒ-ում ծառայել է ԱԱԾ հատուկ նշանակության ջոկատում, հետո աշխատել է ԼՂՀ, նաև ՀՀ ԱԱԾ-ում` որպես օպեր: Այդ ընթացքում Միհրան Պողոսյանն անձամբ է կառավարել քեռու բիզնեսը: Երբ բանան ներկրել-արտահանելու հետ կապված հարկային պարտավորություններից խուսափելու փաստեր էին բացահայտվել, Սերժ Սարգսյանն իր մոտ էր կանչել Գրիգոր Հարությունյանին ու Միհրան Պողոսյանին: Առանձին-առանձին կայացած հանդիպումների ժամանակ էլ Միհրան Պողոսյանը մատնել էր քեռուն և տեղի ունեցածի ողջ մեղքը բարդել նրա վրա: Արդյունքում` Գրիգոր Հարությունյանն ազատվեց ԱԱԾ պետի տեղակալի պաշտոնից, իսկ Միհրան Պողոսյանը դարձավ ԴԱՀԿ ծառայության ղեկավար:
