ՀՀ կառավարության մամլո ծառայությունից «Առաջին լրատվական»-ին տեղեկացնում են, որ վարչապետ Տիգրան Սարգսյանն ընդունել է տարածաշրջանային այցով Հայաստան ժամանած Եվրամիության արտաքին գործերի և անվտանգության քաղաքականության հարցերով բարձր ներկայացուցիչ Քեթրին Էշթոնին:
Վարչապետն ասել է, որ վերջին շրջանում Հայաստանի հարաբերությունները Եվրամիության հետ մտել են զարգացման նոր փուլ, ինչի արդյունքում նոր թափ է հաղորդվել Հայաստանի կողմից իրականացվող բարեփոխումներին:
Ք. Էշթոնն իր գոհունակություն է հայտնել Հայաստան-ԵՄ հարաբերությունների զարգացման ընթացքի վերաբերյալ:
Եվրամիության արտաքին գործերի և անվտանգության քաղաքականության հարցերով բարձր ներկայացուցիչն ասել է, որ քաջ գիտակցում է, թե ինչ ծավալի աշխատանք է իրականացնում Հայաստանը ԵՄ-ի հետ Խորը և համապարփակ ազատ առևտրի և Ասոցացաման համաձայնագրերի ուղղությամբ:
Նշելով, որ տպավորված են տարբեր ուղղություններում Հայաստանի ձեռք բերած առաջընթացով` Ք. Էշթոնն ընդգծել է, որ կան բոլոր նախադրյալները ՀՀ-ԵՄ հարաբերությունների ավելի խորացման և սերտացման համար:
«Մենք պատրաստ ենք օգնել Հայաստանին տնտեսական առաջընթացի ապահովման համար, որին էապես կարող է նպաստել Խորը և համապարփակ ազատ առևտրի համաձայնագրի ստորագրումը, որի շուրջ բանակցությունների գործընթացն առաջիկայում կմտնի նոր փուլ»,- ընդգծել է Ք. Էշթոնը:
Տ. Սարգսյանը Ք. Էշթոնին է ներկայացրել կառավարության առաջնահերթությունները և իրականացվող աշխատանքների ընթացքը՝ մեր երկրում միջին խավի և քաղաքացիական հասարակության ձևավորման, եվրոպական արժեքների ներդրման ուղղությամբ:
Զրուցակիցներն անդրադարձել են նաև տարածաշրջանային և այլ հարցերի:
