Երեկ Լիբանանում 5 հայ երիտասարդներ են ձերբակալվել: Տղաները մեղադրվել են սերիական մարդասպանությունների մեջ: Տեղեկացնենք, որ երիտասարդները ձերբակալվել են շուրջ մեկ ամսվա հետաքննական գործողություններից հետո:
Ինչպես «Առաջին լրատվական»-ին տեղեկացրեց Լիբանանի հայ համայնքի մի ներկայացուցիչ, որը չցանկացավ ներկայանալ, հայ երիտասարդներ Ջորջ, Ազիզ, Մասիս, Մորիս և Միշել Դանիելյանները մեղադրվում են 6-8 ծանր հանցագործությունների մեջ:
«Բեյրութում արդեն մի որոշ ժամանակ սերիական մարդասպանություններ են տեղի ունենում, որոնք ամերիկյան մասշտաբի են: Տղաները մոտեցել են տաքսիների վարորդներին և փորձել դրամ կորզել: Նաև ահաբեկել են՝ ասելով, որ եթե դրամով չօգնեն, կսպանեն: Ով փորձել է ընդդիմանալ, սպանել են` դիակները թողնելով ճանապարհին»,- ասաց մեր լիբանանահայ զրուցակիցը` ցավով նշելով, որ զոհերից մեկը եղել է հայ:
Նրա փաստմամբ` Բեյրութի հայ համայնքը ցնցված է և չի ցանկանում հավատալ, առավել ևս խոսել այդ սպանությունների մասին, քանի որ դրանց հեղինակները հայեր են:
Հարցին՝ ո՞րն է եղել սպանությունների դրդապատճառը, մեր զրուցակիցը պատասխանեց, որ թեև տղաները ձերբակալված են, քննությունը դեռ շարունակվում է: «Այն բնակավայրը, որտեղ ապրում է այդ տղաների ընտանիքը, չափազանց աղքատ է, ամենայն հավանականությամբ՝ կարիքից դրդված են գնացել այդ սպանություններին: Ինչպես ամեն երկրում, այստեղ նույնպես կան շատ աղքատ թաղամասեր, որոնցից մեկը հինգ տղաների ընտանիքի թաղամասն է»,- մեկնաբանեց նա:
Նշենք, որ ասուլիսով էր հանդես եկել նաև Լիբանանի ներքին գործերի նախարար Մերվան Շարբելը՝ ասելով, որ ներքին անվտանգության մարմիններին հաջողվել է հետապնդել և նոյեմբերի 15-ին բռնել 5 հայ երիտասարդներին: Նա նաև պարզաբանել է սպանությունների հանգամանքները: Այժմ հետաքննությունը շարունակվում է:
