Վահրամ Սահակյանը փորձելու է առանց դերասան ֆիլմ նկարել:
Այսօր լրագրողների հետ հանդիպման ժամանակ գրող-հրապարակախոս Վահրամ Սահակյանը խոսեց նաև իր՝ «Ամեն ինչ հայկական սեքսի մասին» ֆիլմի մասին`հավելելով, որ վերնագիրը փոխվել է, քանի որ այդպիսի բան չկա: «Եթե հայկականը կա, որտեղի՞ց կարող է սեքս լինել»,- նկատեց Վ. Սահակյանը:
Գրողը փորձելու է հաջորդ անգամ առանց դերասանների նկարել ֆիլմը, քանի որ ֆիլմի շուրջ հնարավոր չէր եղել հավաքել դերասանական կազմը: «Նկարել ենք, բայց վայ էն նկարելուն: 40 դերասան է նկարահանվել, մեկը մյուսի փոխարեն, քանի որ բոլորը զբաղված էին հեռուստասերիալներով»,- մեկնաբանեց Սահակյանը: Այնուհետև հավելեց, որ մոտակա ժամանակահատվածում ո՛չ պիես կբեմադրվի, ո՛չ ֆիլմ կնկարահանվի, քանի որ շատ խանգարող հանգամանքներ կան:
«Եթե Մշակույթի նախարարություն կոչվողը չի ամաչում, որ Սունդուկյանի թատրոնի դերասանին 40.000 դրամ աշխատավարձ է տալիս… Ի՞նչ եք անում այդ բյուջեն, որ պետությունից հատկացվում է»,- Մշակույթի նախարարությանը դիմեց գրողը: Նա նաև տեղեկացրեց, որ իրեն առաջարկել են 100 սերիանոց հեռուստասերիալի սցենար գրել, սակայն նա հրաժարվել է, քանի որ դա նորմալ չէ:
