Լեռնային Ղարաբաղի նախագահի մամուլի խոսնակ Դավիթ Բաբայանը համոզված է, որ ղարաբաղյան հակամարտության կարգավորման հարցում շուտափույթ լուծում չի լինի: Նման տեսակետ նա հայտնեց «Առաջին լրատվական»-ի հետ զրույցում` անդրադառնալով ԵԱՀԿ Մինսկի խմբի համանախագահների` տարածաշրջան կատարած վերջին այցին:
«Այցից ունեցած ակնկալիքները նորմալ են: ԵԱՀԿ Մինսկի խմբի համանախագահները, փաստորեն, հատեցին ղարաբաղա-ադրբեջանական սահմանն ու անցան Ադրբեջան: Բայց ակնկալիքները հետևյալն են. բոլորի համար պարզ է, որ շուտափույթ կարգավորում չի լինի: Սա շատ բարդ գործընթաց է, որի կարգավորման համար ահագին ժամանակ է պահանջվում: Այստեղ առանձնակի կարևորություն ունի կողմերի հետ աշխատանքը, փոխվստահության միջոցների իրականացումը, որպեսզի ատելության մթնոլորտը ինչ-որ ձևով փոխվի` հատկապես Ադրբեջանի կողմից, որովհետև անհնարին է նման իրավիճակում ինչ-որ բեկում ակնկալել»,- նկատեց Դավիթ Բաբայանը:
Հարցին` ակնկալո՞ւմ է ղարաբաղյան կողմը, որ համանախագահների այցը կարող է բեկումնային լինել, նա նկատեց, որ նման ակնկալիքներ չկան: «Հակամարտության բոլոր կողմերը` Հայաստանը, ԼՂՀ-ն, Ադրբեջանը, ինչպես նաև ԵԱՀԿ Մինսկի խմբի համանախագահող երկրներ Ֆրանսիան ու Ռուսաստանը, մտնում են քաղաքական յուրահատուկ մի իրավիճակ, որտեղ ընտրություններ են սպասվում, ինչը հետին պլան է մղում ղարաբաղյան հարցի կարգավորումը: Բացի այդ, զգալի դեր կունենան նաև 2014-ին Սոչիում կայանալիք օլիմպիական խաղերը: Բոլորի ուշադրությունը սևեռված կլինի այլ խնդիրների վրա: Այս ամենը Հարավային Կովկասը միջազգային աշխարհաքաղաքական ասպարեզում հետին պլան կմղի»,- նկատեց Բաբայանը:
ԼՂՀ նախագահի մամուլի խոսնակի խոսքով՝ միաժամանակ չի կարելի ասել, որ համանախագահաների այցը կարևոր չէր: «Նրանք իրենց այցով ու հայտարարություններով առաջին հերթին նպաստում են զինադադարի ռեժիմի և խաղաղության պահպանմանը: Դա նրանց շնորհքն է»,- ամփոփեց նա:
Նշենք, որ օրերս Հայաստան կատարած այցի շրջանակներում Հայաստանի նախագահ Սերժ Սարգսյանի և ԱԳ նախարար Էդվարդ Նալբանդյանի հետ հանդիպումից հետո ԵԱՀԿ Մինսկի խմբի համանախագահները մեկնել էին ԼՂՀ, այնուհետև` Ադրբեջան: