ՀՀ քաղաքացիական օրենքում «Զրպարտության և վիրավորանքի» հոդվածների ապաքրեականացումը ի սկզբանե ճիշտ էր, բայց օրենքն ընդունվեց հապճեպ՝ հաշվի չառնելով Հայաստանի իշխանավորների ու օլիգարխների և մամուլի հարաբերությունները: Այսպիսով, օրենքը հնարավորություն տվեց սնանկացնելու միջոցով վրեժ լուծել նույն այդ իշխանավորներին ու օլիգարխներին դուր չեկած լրատվամիջոցներից». այսօր տեղի ունեցած ասուլիսում հայտարարեց «Առավոտ» օրաթերթի խմբագիր Արամ Աբրահամյանը:
Նա նկատեց, որ ՍԴ-ն դժվար թե լրատվամիջոցների օգտին որոշում կայացնի՝ «այդ առումով նույնքան հույս ունեմ, որքան, ասենք, որ Թուրքիան կճանաչի Հայոց ցեղասպանությունը»:
«Երկիր» օրաթերթի խմբագիր Բագրատ Եսայանը իր հերթին հույս հայտնեց, որ Սահմանադրական դատարանը, այնուամենայնիվ, դրական որոշում կկայացնի:
«Ժամանակ» օրաթերթի խմբագիր Արման Բաբաջանյանն էլ իր հերթին նկատեց, որ եթե նախկինում հայաստանցի օլիգարխները կամ իշխանավորները դժգոհություններ էին ունենում ԶԼՄ-ներից ծեծում էին խմբագրին կամ մեքենան վառում: «Բազմիցս ասել եմ, որ ավելի լավ է՝ մի ծեծ ուտեմ, քան թերթը կանգնի փակման առաջ: Օրենքի ապաքրեականացումից հետո լրատվամիջոցների դեմ արշավ է սկսվել: Կարծես մարդիկ սպասում էին դրան, որ հայցերով դիմեին դատարաններ: Վիճակը ծայրահեղ է և լուծման կարիք ունի: Հավատում եմ, որ եթե Կարեն Անդրեասյանը գնացել է այս քայլին և դիմել է ՍԴ ` նշանակում է՝ գիտակցում կա, որ թերթերը դժվար կացության առջև են»:
Բագրատ Եսայանը, համաձայնելով Արման Բաբաջանյանի հետ, նշեց, թե վիճակն այնտեղ է հասել, որ ցանկացած մեկը երեք միլիոնի հայցով կարող է դիմել դատարան: «Երեք միլիոնը մեր իրականության մեջ լուրջ գումար է լրատվամիջոցների համար»: Նույն միտքը կրկնեց Արամ Աբրահամյանը՝ հույս հայտնելով, որ ՍԴ-ն իր որոշմամբ երեք միլիոնի շեմը զգալիորեն կիջեցնի:
