Մարդահամարը շարունակվում է սահմանված ընթացակարգով, որի աշխատանքները կավարտվեն ճիշտ ժամանակին: Այսօր «Առաջին լրատվականի» հետ զրույցում հավաստեց Ազգային վիճակագրական ծառայության Մարդահամարի և ժողովրդագրության վարչության պետ Կարինե Կույումջյանը` խոսելով մարդահամարի ընթացիկ աշխատանքների շուրջ:
«Հաշվարարներն իրենց աշխատանքներն են իրականացնում, հրահանգիչները` վերահսկում, ըստ անհրաժեշտության գնում պարզաբանում և ճշգրտում են: Աշխատանքներն իրենց ընթացակարգով շարունակվում են, ինչպես նախապես ծրագրավորել էինք»,- նշեց Կ. Կույումջյանը` հավելելով, որ վերահսկվում է ընդհանուր իրավիճակը:
Այն հարցին, թե հաշվարարների աշխատանքի ընթացքում պատահո՞ւմ են խոչընդոտներ, թե՝ ոչ, պատասխանեց, որ հաշվարարներն ամբողջ բնակչության հետ են աշխատում, ինչը նշանակում է գործ ունենալ տարբեր հասկացողությունների, բնավորությունների, տրամադրությունների և սկզբունքների տեր մարդկանց հետ: «Խնդիրներ, բնականաբար, լինում են, մենք դա նորմալ ենք ընդունում, քանի որ մենք ենք աշխատանքներն իրականացնում և մենք պետք է հարմարվենք»,- ասաց Կ. Կույումջյանը` հավելելով, որ հաճախ աշխատում են համոզելով և հարմարվելով:
Նրա փաստմամբ` լինում են դեպքեր, երբ բնակիչները խնդրում են հարցաթերթիկը մեկ ուրիշ օր լրացնել, հաշվարարները համաձայնում են: «Մենք փորձում ենք հնարավորինս կարգավորել վիճակը, առայժմ ստացվում է»,- հավելեց Մարդահամարի և ժողովրդագրության բաժնի պետը:
Անդրադառնալով մարդահամարի տասնօրյա ժամկետին` մեկնաբանեց, որ աշխատանքներն այնպես են նախատեսված, որ տաս օրվա մեջ կավարտվեն: Կ. Կույումջյանը նաև տեղեկացրեց, որ հոկտեմբերի 22-ից սկսվելու է տաս տոկոսանոց ընտրանքային վերահսկիչ շրջայցը հրահանգիչ-հսկիչների հետ, որը տևելու է հինգ օր:
Այն հարցին, թե ե՞րբ պատրաստ կլինեն մարդահամարի արդյունքները, Կ. Կույումջյանը պատասխանեց, որ փետրվարին կհրապարակվեն նախնական հավաքագրված տվյալները, իսկ 2012 թվականի սեպտեմբեր, հոկտեմբեր ամիսներին արդեն հայտնի կլինեն մշտական և առկա բնակչության նախնական ցուցանիշները:
