«Պահպանենք Թռչկանի ջրվեժը» քաղաքացիական նախաձեռնության անդամները և բնապահպանները շարունակում են պահանջել Թռչկանի ջրվեժի վրա ՀԷԿ-ի կառուցման աշխատանքների անհապաղ դադարեցում: Այսօր լրագրողների հետ հանդիպման ժամանակ բնապահպանության փորձագետ, «Պահպանենք Թռչկանի ջրվեժը» նախաձեռնության ակտիվիստ Արմեն Վերմիշյանը, Լևոն Գալստյանը, «Հանուն կայուն մարդկային զարգացման» ՀԿ նախագահ Կարինե Դանիելյանը և բնապահպանության նախարարության ՋՌԿ ՊԿԲ պետի տեղակալ Հարություն Հարությունյանը բանավիճեցին Թռչկանի ջրվեժի վրա կառուցվելիք հիդրոէլեկտրակայանի խնդրի շուրջ:
Նախարարության աշխատակիցը փորձեց հանգստացնել բնապահպաններին` ասելով, թե կառուցող «Ռոբշին» ՍՊԸ-ն ունի միայն նախնական թույտվություն, որը տվել է նախարարությունը: «Բայց նախարարության նպատակն այն է, որ ճիշտ լուծում գտվի, մենք հրավիրում ենք բոլորին քննարկումների, իսկ շինարարության համար մենք պատասխանատու չենք, քանի որ շինարարության թույլտվությունը տրամադրում է համայնքը»,- ասաց Հ. Հարությունյանը` հավելելով, որ հիդրոէլեկտրակայանը պետք է ջրվեժից ջուր վերցնի միայն վարարումների ժամանակ, իսկ տարվա մի քանի ամիսների ընթացքում չի օգտագործելու ջրվեժի ջուրը: Այս դիտարկման հետ չհամաձայնեցին բնապահպանները, քանի որ, նրանց համոզմամբ, երբ ավարտվի ՀԷԿ-ի շինարարությունը ոչ ոք չի կարող երաշխավորել, որ ջրվեժից ավելի շատ ջուր չի վերցվի:
Կ. Դանիելյանը տեղեկացրեց, որ խոսակցություն է ունեցել ՀՀ վարչապետ Տիգրան Սարգսյանի հետ, որը նշել է, որ բնապահպանության նախարարը գնացել և տեղում ծանոթացել է իրավիճակին, կարծես լուծում է գտնվել, որ ջրվեժը չտուժի: «Վարչապետը խոստացավ, որ մեծ քննարկում կլինի, որին կմասնակցեն և բնապահպանները, և ՀԿ անդամները, և շահագրգիռ անձինք, որի ընթացքում ջրվեժի օգտին որոշում կկայացվի»,- ասաց Կ. Դանիելյանը:
Նշենք, որ Թռչկանի ջրվեժը, որը գտնվում է Շիրակի և Լոռու մարզերի սահմանային հատվածում` Չիրխան գետի վրա և իր բարձրությամբ առաջինն է հանրապետությունում, Հայաստանի բնության գեղեցիկ հրաշալիքներից մեկն է: Իր ջրառատության ցուցանիշով ևս Թռչկանն առաջինն է Հայաստանում: Այս ամենը հաշվի առնելով՝ ՀՀ կառավարությունը ջրվեժը ներառել է ՀՀ բնության հուշարձանների ցանկի մեջ՝ որպես ջրագրական հուշարձան:
