Ադրբեջանական Salam News գործակալության փոխանցմամբ՝ Թուրքիայի վարչապետ Ռեջեփ Էրդողանը Իրաքի արտգործնախարարի միջոցով խիստ ուղերձ է հղել Իրաքի վարչապետ Նուրի Ալ-Մալիքին՝ կապված Հյուսիսային Իրաքում բազավորված և Թուրքիայում ահաբեկչական հռչակված ու արգելված Քրդստանի աշխատավորական կուսակցության (PKK) գործունեության հետ։
Երեկ Էրդողանն իր նստավայրում ընդունել է Իրաքի արտգործնախարար Հոշյար Զիբարիին։ Մոտ կես ժամ տևած այդ հանդիպմանը մասնակցել է նաև Թուրքիայի արտգործնախարար Ահմեդ Դավութօղլուն։ Հանդիպման հիմնական քննարկման առարկան եղել է PKK-ի հարցը։ Զիբարին մտահոգություն է հայտնել, որ Թուրքիան կարող է ռազմական գործողություններ ձեռնարկել Հյուսիսային Իրաքում, ինչին ի պատասխան՝ Էրդողանն ասել է.
«Դա ձեր տարածքն է, և դուք պետք է վերահսկեք այն։ Դուք պարտավոր եք այդ տարածքը մաքրել ահաբեկիչներից։ Եթե դուք դա չանեք, ապա դա կանենք մենք, և դուք կզղջաք այդ մասին։ Դուք պետք է դրա համար անեք ամեն անհրաժեշտ բան և Հյուսիսային Իրաքում ոչնչացնեք PKK-ին։ Մենք վճռականորեն տրամադրված ենք Հյուսիսային Իրաքում ոչնչացնել PKK-ին»։
Հիշեցնենք, որ երեկ էլ Զիբարիի հետ հանդիպել էր Դավութօղլուն և նշել, թե իրենք չեն հանդուրժի, որ PKK-ն Իրաքի տարածքից սպառնա Թուրքիային։ Իսկ հոկտեմբերի 6-ին թուրքական խորհրդարանը մեկ տարով երկարաձգել է անդրսահմանային օպերացիաների անցկացման ժամկետը, որը սպառվում էր հոկտեմբերի 17-ին։ Դրանով թուրքական բանակի առջև «կանաչ լույս» վառվեց՝ Հյուսիսային Իրաք ներխուժելու համար։
