«Իտալիայում հարյուրավոր ցուցարարներ, որոնք բողոքում են իշխանությունների տնտեսական քաղաքականությունից, հոկտմբերի 12-ին փորձել են մուտք գործել Բոլոնիայում գտնվող Իտալական բանկ»,- հայտնում են տեղի ԶԼՄ-ները:
La Stampa ինտերնետ-թերթի տվյալներով՝ ցուցարարները, որոնց շարքերում հիմնականում ուսանողներ են և հանրային կազմակերպությունների ներկայացուցիչներ, բողոքում են ուսումնական հաստատությունների ֆինանսավորման կրճատման, տնտեսական անորոշության և գործազրկության դեմ:
Վերջին ամիսներին Իտալիան ապրում է տնտեսական լուրջ դժվարություններ: Ֆինանսական ճգնաժամը հաղթահարելու համար երկրի խորհրդարանը սեպտեմբերի կեսերին հաստատեց կառավարական նախագիծը` մինչև 2013 թվականի ավարտը պետական ծախսերը 54.3 միլիարդ եվրոյով կրճատելու վերաբերյալ:
Ակտիվիստները երկու անգամ փորձել են մուտք գործել բանկի մասնաշենք, սակայն իրավապահ մարմինները դաժանորեն հետ են շպրտել նրանց` կիրառելով մահակներ: Ցուցարարներն իրենց հերթին մասնաշենքի ուղղությամբ ձվեր և ներկով լի գնդեր են նետել:
Ինչպես հայտնում են ցույցի կազմակերպիչները, իրենք մտադիր չեն դադարեցնել ակցիաները և նմանատիպ բողոքի ցույցեր կկազմակերպեն Հռոմում:
