Հոկտեմբերի 6-9-ը Կանադայում ՀՀ դեսպան Արմեն Եգանյանն աշխատանքային այցով գտնվում էր Կանադայի Բրիտանական Կոլումբիա նահանգում, որի մայրաքաղաք Վիկտորիայում հոկտեմբերի 6-ին Խորհրդարանի հերթական նիստը մեկնարկել է Հայաստանի Հանրապետության անկախության 20-ամյակի շնորհավորանքով:
Նույն օրը դեսպանը մի շարք հանդիպումներ ունեցավ նահանգային պաշտոնյաների հետ, այդ թվում Խորհրդարանի խոսնակի, Ընդերքի և բնական պաշարների, Կրթության, Բազմամշակութայնության նախարարների և մի շարք խորհրդարանականների հետ:
ՀՀ դեսպանը երախտագիտություն է հայտնել 2006թ. նահանգի կողմից Հայոց ցեղասպանության ճանաչման վերաբերյալ համապատասխան բանաձև ընդունելու համար: Հանդիպումներին քննարկվեցին Հայաստանի և Կանադայի միջև առևտրատնտեսական կապերի զարգացմանը, ինչպես նաև մշակույթի և կրթության ոլորտներում համագործակցության խթանմանն ուղղված հարցեր:
Վանկուվեր քաղաքում ՀՀ դեսպանը ծանոթացել է հայ համայնքի հետ, որը թվաքանակով երրորդն է Կանադայում Մոնրեալից և Տորոնտոյից հետո, այցելել հայկական կիրակնօրյա դպրոց: Հոկտեմբերի 8-ին Վանկուվերի «Հայ կենտրոնում» կայացավ ՀՀ Անկախության 20-ամյա հոբելյանին նվիրված միջոցառում, որի հիմնական բանախոսը` Կանադայում Հայաստանի դեսպան Արմեն Եգանյանը, ներկաներին դիմեց շնորհավորական ուղերձով:
Հաջորդ օրը` հոկտեմբերի 9-ին, Վանկուվերի Սուրբ Վարդան Հայկական Առաքելական Եկեղեցում մատուցվեց տոնական պատարագ:
