ԲՏԱ նախարար Մխիթար Հայրապետյանի գրառումը․
Տեխնոլոգիական ոլորտը՝ Հայաստանի կրթական համայնքի կողքին: OpenAI և Firebird տեխնոլոգիական ընկերությունների հետ համագործակցության շնորհիվ ՀՀ կառավարությունը ChatGPT Edu և Codex հարթակները հասանելի կդարձնի դպրոցների ու բարձրագույն ուսումնական հաստատությունների համար։
Կարևորագույն այս ծրագրի ներդրումը նպատակ ունի էապես բարձրացնել ԱԲ կրթության որակը․դասավանդողների համար այն կդառնա աջակցող թվային գործիք, որը հնարավորություն կտա դասերի պլանավորումը, բովանդակության մշակումը և ուսուցման կազմակերպումը իրականացնել առավել ժամանակակից, հարմարեցված և նորարարական մեթոդներով։ Այն նաև կնպաստի անհատական ուսուցման մոտեցումների կիրառմանը՝ հաշվի առնելով սովորողների կարողությունները և ուսումնական կարիքները։ Ուսանողների և աշակերտների համար հարթակը կբացի նոր հնարավորություններ՝ տեղեկատվության որոնման, վերլուծության, տվյալների կիրառման և հետազոտությունների նպատակով։ Նոր հարթակը կօգնի ավելի արդյունավետ կողմնորոշվել մեծ ծավալի թվային տեղեկատվության մեջ, զարգացնել քննադատական մտածողությունը, բարելավել ինքնուրույն ուսումնառության հմտությունները՝ ուսումնական գործընթացում արհեստական բանականության գործիքների կիրառումը դարձնելով համակարգված և նպատակային։
