Կանադայի Ալբերտայի նահանգի ղեկավար Դանիել Սմիթը հայտարարել է, որ հոկտեմբերի 19-ին կայանալիք հանրաքվեի ընթացքում բնակիչները կքվեարկեն Կանադայի կազմում մնալու կամ նահանգի անջատման շուրջ հետագայում հանրաքվե անցկացնելու շուրջ։ Այս մասին հաղորդում է BBC-ն։
Սմիթը նշել է, որ Ալբերտայի բնակիչներին կհարցնեն՝ արդյոք նահանգը պետք է մնա Կանադայի կազմում, թե նահանգի կառավարությունը պետք է սկսի Կանադայի սահմանադրությամբ պահանջվող իրավաբանական գործընթաց, որպեսզի անցկացնի նահանգային հանրաքվե Կանադայից անջատվելու հարցի շուրջ։
Նա նշել է, որ անձամբ քվեարկելու է Կանադայի կազմում Ալբերտայի մնալու օգտին, և որ իր կառավարությունը նման դիրքորոշում ունի։
Ալբերտայի ավելի քան 300 000 բնակիչ քվեարկել է Կանադայի կազմից նահանգի դուրս գալու վերաբերյալ հանրաքվե անցկացնելու օգտին։ Հանրաքվեի կազմակերպման իրավունքի քննարկման համար պահանջվում էր 178 000 ստորագրություն։
Այնուամենայնիվ, ըստ հարցումների, ալբերտացիների մեծամասնությունը դեմ է Կանադայի կազմից դուրս գալուն։
Մայիսի 14-ին Դաշնային դատարանի դատավոր Շեյնա Լեոնարդն արգելափակել է Կանադայից Ալբերտայի նահանգի անջատման գործընթացը՝ վճիռը հիմնավորելով այն հանգամանքով, որ տարածաշրջանի ղեկավարությունն այդ հարցով չի խորհրդակցել երկրի բնիկ ժողովուրդների ներկայացուցիչների հետ։ Սմիթը նշել է, որ բնակչությունն իրավունք ունի հանրաքվեի, քննադատել է դատարանի վճիռը և խոստացել է բողոքարկել այն։
Ալբերտան Կանադայի կազմ է մտել 1905 թվականին։ 1940-ականներին տարածաշրջանում հայտնաբերել են նավթի մեծ պաշարներ, սակայն ըստ որոշ ալբերտացիների՝ դաշնային կառավարությունը խոչընդոտել է նավթագազային արդյունաբերությանը՝ հօգուտ կլիմայի հետ կապված օրենսդրության։
