«Հրապարակ» օրաթերթի գլխավոր խմբագիր Արմինե Օհանյանը ողջունում է Հայաստանի Մարդու իրավունքների պաշտպան Կարեն Անդրեասյանի նախաձեռնությունը` զրպարտության և վիրավորանքի վերաբերյալ Քաղաքացիական օրենսգրքի դրույթների հակասահմանադրականության խնդրով այս շաբաթ դիմել Սահմանադրական դատարան: Այս մասին նա ասաց «Առաջին լրատվական»-ի հետ զրույցում:
«Միջազգային կառույցների կողմից իրականացվող ճնշումներն, իհարկե, նման որոշում կայացնելու վրա դերակատարություն չեն կարող չունենալ, սակայն երևույթն ավելի շատ հակված եմ պայմանավորելու ներքին ճնշումներով: Մենք` մամուլի ներկայացուցիչներս, օրենսդրական այդ փոփոխության դեմ անընդհատ հայտարարություններ ենք անում, մամուլի ասուլիսներ հրավիրում, անգամ մտածում ենք ակցիաներ կազմակերպելու մասին»,- նկատեց Արմինե Օհանյանը:
Նա նաև կարծիք հայտնեց, որ Կարեն Անդրեասյանը, հնարավոր է, հայաստանյան այլ կառույցների հետ խնդիրներ ունի և մամուլի աջակցությունը ստանալու համար այլ քայլի պարզապես չէր կարող դիմել: «Հայաստանի ՄԻՊ-ն իր այս բավական խելացի և հեռահար քայլով սխալների սրբագրում է անում: Կարեն Անդրեասյանը երիտասարդ է և նման քայլով, հավանաբար, ցանկանում է կայացնել ոլորտը, շտկել իր սխալները: Սա լավ նախաձեռնություն է, և տա Աստված, որ նա կարողանա լուծել իր առջև դրված խնդիրը: Հուսանք, որ ամեն բան լավ կլինի, և՝ «լավ ըսենք, որ լավ ըլլա»,- եզրափակեց «Հրապարակ» օրաթերթի խմբագիրը:
Հիշեցնենք, որ Հայաստանի ՄԻՊ Կարեն Անդրեասյանը մտադրություն է հայտնել զրպարտության և վիրավորանքի վերաբերյալ Քաղաքացիական օրենսգրքի դրույթների հակասահմանադրականության խնդրով այս շաբաթ դիմել Սահմանադրական դատարան:
Նա 2009 թականին օրենսդրական փոփոխության մի գաղափար էր առաջարկել, որի էությունը կայանում էր զրպարտությունն ու վիրավորանքը ապաքրեականացնելու և այդ արարքների համար քաղաքացիաիրավական պատասխանատվություն սահմանելու մեջ: Անցյալ տարվա մայիսին օրենսդրական փոփոխությունն ընդունվել էր, ինչից հետո տպագիր մամուլի դեմ ավելի քան 15 հայց էր ներկայացվել։
Հայաստանյան լրատվամիջոցները սուր քննադատության են ենթարկում զրպարտությունը ապաքրեականացնող օրենսդրական փոփոխությունները` բողոքելով հատկապես դատարաննեևրի սահմանած տուգանքների խոշոր չափերից:
Հիշեցնենք, որ Հայաստանի երկրորդ նախագահ Ռոբերտ Քոչարյանը զրպարտության եւ վիրավորանքի համար թերթի դեմ հայց էր ներկայացրել: Հայցվոր կողմը պնդում է, որ թերթի` «Քոչարյանին ոչնչացնում են, Ծառուկյանին` բացատրո՞ւմ» վերնագրով հոդվածում Ռոբերտ Քոչարյանի պատիվն ու արժանապատվությունը արատավորվել է: Քոչարյանի ներկայացուցիչը պահանջում է հերքել այդ տեղեկությունները եւ փոխհատուցել 6 միլիոն դրամ, որից 3 միլիոնը` զրպարտության եւ վիրավորանքի համար, իսկ մյուսը 3 միլիոնը` Քոչարյանի շահերը պաշտպանող «Ջի փարթնըրս» փաստաբանական ընկերության ծառայությունների համար:
Դատական մեկ այլ հայց այս տարի «Հրապարակ»-ի դեմ ներկայացրել էր Հայաստանի դատական դեպարտամենտի ղեկավար Միսակ Մարտիրոսյանը:
Կենտրոն և Նորք Մարաշ վարչական շրջանների ընդհանուր իրավասության դատարանը 3 մլն դրամի չափով արգելանք է դրել թերթի վրա և պարտադրել չտարածել դատական վեճի հետ կապված որևէ տեղեկատվություն` մինչև չի կայկացվել գործով վերջնական որոշումը:
Թերթի խմբագրի խոսքով՝ քանի որ իրենք դեռ չեն ստացել հայցադիմումը, միայն կարող են կռահել, թե որ հոդվածի բովանդակությունն է վիճարկում դատական դեպարտամենտի ղեկավարը:
