Իրանի արտաքին գործերի նախարար Աբբաս Արաղչին ընդունել է Պակիստանի բանակի շտաբի պետ Ասիմ Մունիրին, որը Թեհրան է ժամանել Վաշինգտոնից հաղորդագրություն փոխանցելու համար։ ֆելդմարշալին դիմավորելու տեսանյութը՝ համապատասխան գրառմամբ, Արաղչին հրապարակել է X սոցիալական հարթակում։
«Ես շնորհակալություն հայտնեցի Պակիստանին երկխոսությունը բարեհաճորեն հյուրընկալելու համար՝ ընդգծելով, որ սա արտացոլում է մեր խորը և հրաշալի երկկողմ հարաբերությունները», – գրել է Արաղչին ապրիլի 15-ի երեկոյան։
Նա նշել է, որ Իրանի և Պակիստանի հանձնառությունը տարածաշրջանում խաղաղությունն ու կայունությունը խթանելու հարցում «մնում է ամուր և համատեղ»։
Իրանական Press TV-ն հաղորդում է, որ պակիստանյան պատվիրակության այցի նպատակն է ԱՄՆ-ի ուղերձը փոխանցել Իրանի ղեկավարությանը և պլանավորել բանակցությունների հաջորդ փուլը։
Միևնույն ժամանակ, Tasnim լրատվական գործակալությունը հաղորդում է, որ Իրանը պաշտոնական գնահատում կանցկացնի՝ որոշելու, թե արդյոք կմասնակցի ԱՄՆ-ի հետ բանակցությունների հաջորդ փուլին։
«Պակիստանի բանակի հրամանատար Ասիմ Մունիրի գլխավորած պակիստանյան պատվիրակության և իրանցի պաշտոնյաների միջև այսօրվա հանդիպումից հետո իրանական թիմը կանցկացնի անհրաժեշտ վերլուծություն, որից հետո որոշում կկայացվի Իրանի և ԱՄՆ-ի միջև բանակցությունների հաջորդ փուլի վերաբերյալ», – գործակալությանը հայտնել է իրազեկ աղբյուրը։
