Ապրիլի 15-ին Իրանի արտաքին գործերի նախարար Աբաս Արաղչին Թեհրանի օդանավակայանում անձամբ դիմավորել է Պակիստանի Զինված ուժերի գլխավոր հրամանատար Ասիմ Մունիրին: Այդ մասին հայտնել է Իրանի արտաքին գործերի նախարարությունը: Ավելի վաղ tasnim-ը հայտնել է, որ ֆելդմարշալ Մունիրը «կժամանի Թեհրան, որպեսզի փոխանցի Վաշինգտոնի ուղերձը և նախապատրաստի բանակցությունների երկրորդ փուլը»:
Axsios-ի աշխատակից Բարակ Ռավիդը նույն օրը սոցիալական X հարթակում գրել է, որ «Միացյալ Նահանգները և Իրանը մոտենում են պատերազմը դադարեցնելու մասին շրջանակային համաձայնագրի ընդունմանը»: Թեհրանին Վաշինգտոնի «ուղերձի» որևէ մանրամասնություն հայտնի չէ: Ամերիկյան երկու պաշտոնյա Ռավիդին ասել են, որ անցած օրերին ԱՄՆ նախագահի հատուկ բանագնաց Սթիվեն Ուիթկոֆը «հեռախոսային բանակցություններ է վարել իրանցիների հետ, տեղի է ունեցել առաջարկությունների փոխանակում, իսկ երեքշաբթի օրը կողմերը հասել են համաձայնության»:
Վերջին ձևակերպումից հստակ չի հետեւում՝ ԱՄՆ-ը և Իրանը համաձայնության են հասել բանակցությունների երկրորդ փուլ անցկացնելու և որևէ փաստաթուղթ քննարկելո՞ւ, թե՞ պատերազմը դադարեցնելու սկզբունքների հարցում: Ֆելդմարշալ Մունիրի Թեհրան այցից կարելի է ենթադրել, որ հեռախոսային բանակցությունների և շահագրգիռ երկրների հետ անցկացված խորհրդատվությունների հիման վրա Վաշինգտոնում «կազմվել է «շրջանակային համաձայնության» նախագիծ», որն էլ Պակիստանը՝ որպես միջնորդ, ներկայացրել է Թեհրանին:
Ֆելդմարշալ Մունիրը ոչ պաշտոնապես ճանաչված է որպես Պակիստանի փաստացի առաջնորդ: Անցյալ տարի նա այցելել է Վաշինգտոն և հանդիպել ԱՄՆ նախագահ Դոնալդ Թրամփին: Նրա Թեհրան այցը այդ առումով բացառիկ կարևորություն է ստանում: Մանավանդ հայտնի է, որ Պակիստանը Սաուդյան Արաբիայի տարածքում կործանիչներ է տեղակայել՝ Իրանի նոր հարձակումը դիմագրավելու մտադրությամբ:
Իրավիճակի դելիկատությունը, թերևս, բացահայտել է Իրանի արտաքին գործերի նախարար Արաղչին: Նա ասել է, որ միջուկային ծրագիրը «Իրանի բացառիկ իրավունքն է, բայց սահմանափակումների հարցը քննարկելի» է: Ավելի վաղ տեղեկություն է տարածվել, որ ԱՄՆ-ը Իրանին «հարկադրում է քսան տարով սառեցնել միջուկային ծրագիրը, իսկ հարստացված ուրանի պաշարները հանձնել»: Բարակ Ռավիդի տեղեկություններով՝ իրանա-ամերիկյան բանակցությունները «Իսլամաբադում կարող են վերսկսվել եկող շաբաթավերջին»:
