ԵՄ-ն ժամանակի ընթացքում կարող է ճանաչել Սիրիայի Ազգային խորհուրդը, ինչպես դա արեց լիբիական ընդդիմության պարագայում: Ինչպես հաղորդում է ИТАР-ТАСС-ը, ԵՄ արտաքին գործերի նախարարների նիստի ժամանակ այդ մասին հայտարարել է Եվրամիության արտաքին գործերի և անվտանգության հարցերով գերագույն ներկայացուցիչ Քեթրին Էշթոնը:
Նա հիշեցրել է, որ լիբիական Ազգային անցումային խորհրդի դեպքում ԵՄ ղեկավարներն «անընդհատ հանդպիումներ են ունեցել նրա ներկայացուցիչների հետ, երկխոսել, ապա դրանից հետո ԵՄ առանձին երկրներ սկսել են ճանաչել նրա իշխանությունը»:
Քեթրին Էշթոնը կրկին հիշեցրել է, որ ԵՄ-ն անհրաժեշտ է համարում, որ Սիրիայի նախագահ Բաշար Ասադը դադարեցնի հետապնդումներն ըննդիմության ներկայացուցիչներին նկատմամբ, հրաժարվի իշխանությունից, և երկրում ժողովրդավարություն հաստատվի:
Հիշեցնենք, որ Սիրիայում շարունակվում են ընդհարումներն իշխանությունների և ընդդիմության միջև, որի հետևանքով կիրակի օրը մահացել է 14 խաղաղ բնակիչ և 17 զինվորական:
