Նիգերի նախարարների խորհուրդը հաստատել է ընդհանուր զորահավաքի մասին հրամանագրի նախագիծը։
Այս մասին հայտնում է Actu Niger լրատվական պորտալը։
«Հրամանագիրը թելադրված է ազգային տարածքի ամբողջականությունը, ինքնիշխանությունը պահպանելու, ինչպես նաև բնակչության, ինստիտուտների և պետության կենսական շահերը ցանկացած ներքին կամ արտաքին սպառնալիքից պաշտպանելու անհրաժեշտությամբ։ Այն սահմանում է ընդհանուր զորահավաք կազմակերպելու, նախապատրաստելու և անցկացնելու կարգը»,-բանաձևից հատվածներ է մեջբերում լրատվականը։
Հրամանագրի նախագծում նշվում է, որ յուրաքանչյուր քաղաքացի պարտավոր է պահպանել ընդհանուր զորահավաքի հետ կապված դրույթներն ու միջոցառումները, այդ թվում՝ անհապաղ արձագանքել զորակոչի հրամաններին: Այն նաև նախատեսում է նյութական ռեսուրսների և տրանսպորտային միջոցների բռնագրավման հնարավորություն բանակի կարիքների համար։
Ուժի մեջ մտնելու համար հրամանագիրը պետք է ստորագրվի պետության ղեկավարի կողմից և հրապարակվի Նիգերի Հանրապետության պաշտոնական տեղեկագրում։
Նիգերի զինված ուժերի ներկայիս թվաքանակը կազմում է 40 հազար մարդ: Երկրի ղեկավարությունը պլանավորել է մինչև 2026 թվականը զինված ուժերի անձնակազմի թիվը հասցնել 100 հազարի:
