Ադրբեջանական Salam News գործակալության փոխանցմամբ՝ Անկարայում տեղի է ունեցել «Թյուրքալեզու երկրների անկախության 20-ամյակը» խորագրով միջազգային կոնֆերանսը, որի կազմակերպիչներից մեկը Թուրքիայի արտգործնախարարությունն է։
Կոնֆերանսի բացմանը ներկա են գտնվել Թուրքիայի նախագահ Աբդուլլահ Գյուլը, փոխվարչապետ Բեքիր Բոզդաղը, արտգործնախարար Ահմեդ Դավութօղլուն, Ադրբեջանի արդարադատության նախարար Ֆիքրեթ Մամեդովը և այլք։
Կոնֆերանսը սկսվել է մեկ րոպե լռությամբ, որով հարգվել է թյուրքական աշխարհի նահատակների (շեհիթ) հիշատակը։ Ապա ցուցադրվել է «Թյուրքալեզու երկրների անկախության 20-ամյակը» խորագրով ֆիլմ։
Կոնֆերանսում Դավութօղլուն ընդգծել է թյուրքական աշխարհի անցած պատմական ուղին և թյուրքական յուրաքանչյուր երկրի կարևորությունը։ Իսկ Աբդուլլահ Գյուլը կարևորել է թյուրքալեզու երկրների միջև կապերի զարգացումը՝ ընդգծելով թյուրքալեզու երկրների համագործակցության խորհրդի ստեղծումը։
Գյուլը նաև հայտարարել է, որ Թուրքիան, Ադրբեջանը, Ղազախստանը, Թուրքմենստանը, Ղրղզստանը և Ուզբեկստանը մեկ ազգ են, 6 պետություն։
Հիշեցնենք, որ ավելի վաղ նշվում էր «մեկ ազգ, երկու պետություն» արտահայտությունը, որի տակ նկատի էր առնվում Թուրքիան ու Ադրբեջանը, և որի հեղինակն Ադրբեջանի նախկին նախագահ Հեյդար Ալիևն է։
Ապա ի հայտ եկավ «մեկ ազգ, երեք պետություն» արտահայտությունը, որում ներառվեց նաև ինքնահռչակ Հյուսիսային Կիպրոսի թուրքական հանրապետությունը (ՀԿԹՀ)։ Ուշագրավ է, որ վերջինս այս անգամ դուրս է մնացել Գյուլի վերոնշյալ արտահայտությունից։