Թուրքական Yeni Şafak թերթի փոխանցմամբ՝ սեպտեմբերի 22-ին քրդաբնակ Դիարբեքիր նահանգի Սուր շրջանում ձերբակալվել են Ֆրանսիայի 9 քաղաքացիներ, որոնցից երկուսը հայեր են՝ Տիգրան Սարգիս Արչագ Եգավյանը և Էյուփ Սուլթան Դեմիրիչիվին: Ձերբակալվածների թվում նշվում է նաև ոմն Սևան Միքայել Մինասյանի անունը:
Ձերբակալվածները կասկածվում են Թուրքիայում ահաբեկչական հռչակված և արգելված Քրդստանի աշխատավորական կուսակցության (PKK) հետ կապեր ունենալու մեջ։ Նրանց մոտից առգրավված փաստաթղթերը վկայում են այն մասին, որ Ֆրանսիան աջակցում է PKK-ին և ձախ կուսակցություններին։
Թուրքական թերթը գրում է, որ հիմա էլ պարզվում է՝ Գերմանիայից բացի, եվրոպական երկրներից PKK-ին աջակցում է նաև Ֆրանսիան։
Հիշեցնենք, որ Թուրքիայի վարչապետ Էրդողանը հայտարարել էր, թե գերմանական հիմնադրամները գումարներ են հատկացնում PKK-ին, ինչը հերքվել է Թուրքիայում Գերմանիայի դեսպանի կողմից։
