«Անշուշտ, կա փոփոխության կարիք, վիճակը, թեկուզ դեպի ավելի վատը գնա, բայց պետք է փոխվի: Դրա անունը կլինի հեղափախություն, հեղաշրջում, թե քաղաքացիական պատերազմ՝ միևնույնն է»,- «Առաջին լրատվականի» հետ զրույցում, վերլուծելով ժողովրդի շրջանում աստիճանաբար ուժգնացող հեղափոխական տրամադրությունները, ասաց բանաստեղծ Հուսիկ Արան:
Նրա խոսքով` նախ պետք է փոխվի մեր մտածողությունը, մարդիկ պետք է մտածեն, որ «չինովնիկը գալիս է ոչ թե գռփելու ու չռփելու, ստրկացնելու, այլև որոշակի պարտականություններ ունի իր երկրի, ժողովրդի առաջ ու պետք է ծառայի իրեն»:
«Աշխարհը գնացել է դեպի ժողովրդավարական կարգեր, մենք՝ ճորտատիրական: «Հայաստան» ասելով՝ ես հասկանում եմ ճորտատիրական կամ ստրկատիրական Հայաստան»,- նշեց բանաստեղծը:
Նրա խոսքով՝ ներկայում ականատես ենք համահարթեցված վերևի ու ներքևի, այսինքն`առկա են ճորտատիրական կարգեր` միջին խավի բացակայության պայմաններում, որտեղ կառավարության անդամները, խորհրդարանականները ոչ մի կերպ չեն տարբերվում օլիգարխներից: «Պարոն քաղաքապետը կրպակներ փակելով է զբաղված, փաստորեն՝ վերացնում են միջին խավը: Ամեն ինչ անում են, որ այստեղ մնան իշխողներ և ճորտեր: Իշխանություններն ամեն ինչ անում են երկիրը դատարկելու համար: Հազիվ երկու միլիոն մարդ է մնացել»,- զայրացած ասաց բանաստեղծը` ընդգծելով, որ իշխանությունների նպատակը ճորտատիրական կարգերի հաստատումն է:
Մեզ հետ զրույցում Հուսիկ Արան ասաց, որ պատրաստ է կանգնել ժողովրդի կողքին, Ազատության հրապարակում է եղել 88-ի շարժման ժամանակ, պայքարել ու պայքարում է մի շարք գրողների հետ, ովքեր պատրաստ են կանգնել ու բարձրաձայնել այդ խնդիրների մասին:
«Սա այն Հայաստանը չէ, որի համար պայքարում էինք: Սա մի խումբ հանցագործների Հայաստանն է, և միանշանակ՝ պետք է նրանցից ազատվել: Խնդիրը անհատը չէ`Սերժը գնաց, Պողոսիկը եկավ, համակարգը պետք է փոխվի: Շախմատային խաղատախտակի վրա թևով պետք է սրբել բոլոր ֆիգուրներին ու նորից շարել»,- խոսքը եզրափակեց Հուսիկ Արան:
