Եմենի Հոդեյդայի նահանգի վրա ԱՄՆ-ի հարձակումների հետևանքով առնվազն 3 մարդ է զոհվել, ևս 3 մարդ վիրավորվել է: Այս մասին հայտնել է հութիներին պատկանող Al Masirah հեռուստաալիքը։
Տեղեկությունների համաձայն՝ հարված է հասցվել Ալ-Մանսուրիա թաղամասի ջրի կառավարման շենքին:
ԱՄՆ-ն թիրախավորել է նաև Սաադայի և Հաջայի նահանգները։ Հաջայի նահանգում գնդակոծության են ենթարկվել բժշկական կենտրոնն ու դպրոցը։ Բացի այդ, ավիահարվածներով նաև թիրախավորվել են Սաադա քաղաքի այն շրջանները, որտեղ թաքնված են եղել Եմենի զինյալ առաջնորդները։
Եմենի հութիների «Անսար Ալլահ» խմբավորումը հայտարարել է, որ հրթիռներով և անօդաչու թռչող սարքերով թիրախավորել են Կարմիր ծովում գտնվող թշնամու ռազմանավերը՝ ամերիկյան «Հարի Թրուման» ավիակրի գլխավորությամբ։ Ըստ հութիների՝ սա ավիակրի վրա երրորդ հարձակումն է վերջին 24 ժամվա ընթացքում։
Խմբավորումը նաև նշել է, որ իրենց գործողություններն ամերիկյան ուժերի դեմ կշարունակվեն աճող տեմպերով՝ թիրախավորելով նրանց ռազմանավերը։
Հութիները հայտնել են, որ իրենց գործողությունները չեն դադարի այնքան ժամանակ, քանի դեռ չի դադարեցվել ագրեսիան Գազայի վրա և չի վերացվել պաշարումը։
«Թշնամի Իսրայելի դեմ մեր գործողությունները նպատակ ունեն կասեցնել պաղեստինցի ժողովրդի դեմ իրականացվող ցեղասպանությունը», – նշվել է հայտարարության մեջ։
Հութիները նաև տեսանյութ են հրապարակել, որով հաստատում են Եմենի օդային տարածքում ամերիկյան MQ-9 Reaper հետախուզական և հարձակողական անօդաչու թռչող սարքի ոչնչացումը։
ԱՄՆ-ն մարտի 15-ից ի վեր ամենօրյա ռմբակոծություններ է իրականացնում Եմենի վրա այն բանից հետո, երբ հութիները սպառնացել են վերսկսել հարձակումները Կարմիր ծովում Իսրայելի հետ առնչվող նավերի վրա: Հարձակումների հետևանքով զոհվել է ավելի քան 60 մարդ, այդ թվում՝ կանայք և երեխաներ:
2023 թվականի հոկտեմբերի 7-ին Իսրայելի և ՀԱՄԱՍ-ի միջև բռնկված ռազմական գործողություններից հետո հութիները սկսել են տասնյակ հարձակումներ իրականացնել Կարմիր ծովում և Արաբական ծովում իսրայելական կամ Իսրայելի հետ առնչվող նավերի վրա՝ Եմենում իրենց վերահսկողության տակ գտնվող տարածքներից կիրառելով հրթիռներ և անօդաչու սարքեր՝ հայտարարելով, որ այդ կերպ իրենց աջակցությունն են հայտնում Պաղեստինին:
