Այսօր Վերաքննիչ քաղաքացիական դատարանում կայացած Քոչարյաններն ընդդեմ «Ժամանակ» օրաթերթի հիմնադիր «Սկիզբ Մեդիա Կենտրոն» ՍՊԸ-ի դատական նիստի ընթացքում պարզվեց, որ հայտնաբերվել է առաջին ատյանի դատարանից վերաքննիչ տեղափոխելու ճանապարհին գործից անհետացած շատ կարևոր տեղեկանքը:
Ըստ ընկերության շահերի ներկայացուցիչ Նիկոլայ Բաղդասարյանի` խոսքը վերաբերում է դեռ առաջին ատյանի դատարանում ընթացող դատավարության ժամանակ իր կողմից պատահմամբ հայտնաբերված հայտնի անստորագիր տեղեկանքին, ուր գրված է եղել, թե ինչ հիմքերով պետք է բավարարվի Քոչարյանների ընտանիքի հայցն ընդդեմ «Ժամանակ» օրաթերթի և ինչու պետք է մերժվեն «Ժամանակի» փաստաբանի փաստարկները: Այդ տեղեկանքը հայտնաբերվել էր դեռ դատավարության ժամանակ, երբ չկար դատավորի վճիռը:
Իսկ երբ փաստաբան Բաղդասարյանը հարց է բարձրացրել, թե ու՞մ կողմից է պատրաստվել տեղեկանքը և ի՞նչ է դա նշանակում, գործով նախագահող դատավոր Արայիկ Մելքումյանը, ինչպես նաև Ռոբերտ Քոչարյանի ընտանիքի ներկայացուցիչները պատասխանել են, որ տեղյակ չեն: Բայց փաստը` փաստ է, որ այն կցվել է գործին:
Արդեն Վերաքննիչում կայացած նիստում դատարանը նշել է, որ գործից այդ փաստաթուղթը չի անհետացել և փորձել է ընկերության փաստաբանից պարզել, թե ինչու է այդ անստորագիր տեղեկանքը հետաքրքրում նրան` ուզում է այն թույլատրելի՞ ապացույց ճանաչվի, թե՞ անթույլատրելի: Նիկոլայ Բաղդասարյանը պատասխանել է` թողեք այն մնա գործին կցված:
Դատարանն էլ, որպեսզի հասկանա տեղեկանքի ծագման աղբյուրը, իսկությունը և փաստաբանի հեռահար նպատակը, հետաձգել է դատական նիստը մինչև հոկտեմբերի 6-ը, ժամը 14.00:
