Ամստերդամի Սխիպխոլ օդանավակայանը ժամանակավորապես փակում է թռիչքուղիներից մեկը՝ արևի փայլքի պատճառով, որոնք խանգարում են օդաչուներին վայրէջքի ժամանակ: Այս մասին Ֆեյսբուքի իր էջում գրել է «Հիդրոօդերևութաբանության և մոնիթորինգի կենտրոն» ՊՈԱԿ-ի տնօրեն Լևոն Ազիզյանը։
Ամենահաճախ օգտագործվող թռիչքուղին կփակվի արևոտ եղանակին առավոտյան ժամը 10։00-ից մինչև կեսօր: Այս երկու ժամվա ընթացքում այն սովորաբար օգտագործում են 55-ից 65 ինքնաթիռ։ «Արևային ճագարների» պատճառը արևային էլեկտրակայանն է, որը զբաղեցնում է մոտ 100 հեկտար տարածք և ապրիլին վերջնական գործարկումից հետո էներգիա կարտադրի 40 000 տնային տնտեսությունների համար։
Սխիպխոլ օդանավակայանում հայտնել են, որ թռիչքուղին կփակվի առավոտյան, եթե արևը շողա, մինչ տեղական խորհուրդը և արևային էլեկտրակայանի սեփականատերերը աշխատեն խնդիրը լուծելու համար: Տարբերակներից մեկն այն է, որ տեղադրվի հատուկ տեսակի ապակի՝ «խիտ տեքստուրայով», որը կլանում է արևի լույսը, այլ ոչ թե արտացոլում այն:
Մարտի 23-ից հետո ակնկալվում է, որ արևի դիրքը կփոխվի, և փայլքի քանակը զգալիորեն կնվազի, ինչը թույլ կտա թռիչքուղուն վերսկսել բնականոն աշխատանքը: Սխիպխոլը՝ Եվրոպայի ամենաբանուկ օդանավակայաններից մեկը, լայնորեն օգտագործում է արևային էներգիան՝ նվազեցնելու իր ազդեցությունը կլիմայի վրա, սակայն թռիչքուղու փակումը անհրաժեշտ փոխզիջում է անվտանգ ավիաթռիչքներ ապահովելու համար:
