«Սիվիլիթաս» հիմնադրամի կողմից այսօր կազմակերպված
«Հարյուր հարց, հարյուր պատասխան» քննարկումների շարքի հերթական հյուրը` Հայաստանում ԱՄՆ նախկին դեսպան Ջոն Մարշալ Էվանսը, անդրադարձավ Ցեղասպանության ճանաչմանը խոչընդոտող` ԱՄՆ-ում առկա այն երկու տեսակետներին, թե ԱՄՆ-ը չի ցանկանում փչացնել հարաբերությունները Թուրքիայի հետ և ԱՄՆ-ում «հրեական գործոն» կա: Նա նշեց, որ երկրորդ տեսակետը չափազանցված է:
Ինչ վերաբերում է Թուրքիայի հետ ԱՄՆ-ի հարաբերություններին, ապա նախկին դեսպանը նշեց, որ դրանք դաշնակցային հարաբերություններ են: «Կարևորն այն է, որ գնալով ներքին քննարկումներ են ծավալվում Թուրքիայի ներսում: Ինչպիսին կլինի Ուրուգվայի, ԱՄՆ-ի տեսակետը` այնքան կարևոր չէ, կարևորը Թուրքիայի ներսի վերաբերմունքն է»,- ասաց դեսպանը` հավելելով, որ իրավիճակ է փոխվում Թուրքիայում, և այս տարի Ցեղասպանության վերաբերյալ այնտեղ չորս հիշատակում-արարողություն է եղել:
«Մեր նախագահ Օբաման կարևորեց սեփական պատմությունը հասկանալը հենց Թուրքիայի խորհրդարանում, և բոլորը հասկացան, թե դա ինչ է նշանակում, թեև արևմտյան մամուլը դա բաց թողեց, ինչպես հաճախ է պատահում»,- նկատեց ՀՀ-ում ԱՄՆ նախկին դեսպանը:
«Աթաթուրքը մեղադրեց Երիտթուրքերին` կարծեմ 1926 թվականի իր հարցազրույցում` քրիստոնյաների նկատմամբ կատարվածի համար»,- ավելացրեց Էվանսը:
