Թուրքական Milliyet թերթի փոխանցմամբ՝ երեկ Եվրախորհրդարանում տեղի է ունեցել Թուրքիա-ԵՄ միջխորհրդարանական հերթական նստաշրջանը։ Թուրքական կողմից դրան մասնակցել է եվրոպական հարցերով պետնախարար և ԵՄ-ին Թուրքիայի անդամակցության գծով գլխավոր բանագնաց Էգեմեն Բաղըշը։
Նիստում քննարկվել են Թուրքիայի ու ԵՄ-ի ներկայիս հարաբերությունները, ԵՄ-ին Թուրքիայի անդամակցության հեռանկարը, Թուրքիայի հետ գործող ԵՄ-ի անցագրային ռեժիմի մեղմացումը, ինչպես նաև թուրք-կիպրական հարաբերությունների վատթարացումը։
Ներքին հարցերով ԵՄ-ի կոմիսար Սեսիլիա Մալմստրյոմը հայտարարել է, որ ԵՄ-ը կարող է մեղմացնել Թուրքիայի հետ անցագրային ռեժիմը, և որ դա կարող է տեղի ունենալ մոտ ժամանակներս։ Դրանից առաջին հերթին կօգտվեն թուրք ուսանողներն ու գործարարները։
Թուրքական թերթը գրում է, որ դա կհանդիսանա անցագրային ռեժիմի լրիվ վերացման ճանապարհին առաջին քայլը։
Հիշեցնենք, որ երբ 2010 թվականի հոկտեմբերի 3-ին լրացավ անդամակցության շուրջ Թուրքիայի հետ ԵՄ-ի բանակցություններ սկսելու հնգամյակը, Էգեմեն Բաղըշը հայտարարել էր. «Մեր ժողովուրդն ականատես է լինում երկակի ստանդարտների կիրառման: Թուրքիայի և ԵՄ-ի միջև գործող վիզային ռեժիմը Թուրքիան մեկուսացնում է ԵՄ-ից: Չնայած դրան` Թուրքիան այսօր էլ նույն խանդավառությամբ ու նպատակամղվածությամբ շարունակում է ԵՄ-ին ինտեգրվելու գործընթացը, սակայն կան այնպիսիները, որոնք ստուգում են Թուրքիայի համբերությունը:
Մեր եվրոպական գործընկերները ստիպված են որևէ որոշում կայացնել: Ինչպես նշում է մեր վարչապետը, Թուրքիան այն երկիրը չէ, որին կարելի է կանգնեցնել շեմին: Թուրքիան աղքատ մուսուլմանական երկիր չէ. Թուրքիայում մեկ շնչին բաժին ընկնող ազգային եկամտի մակարդակը ԵՄ անդամ որոշ երկրներից էլ բարձր է»։
