Ադրբեջանական Salam News գործակալությանը տված հարցազրույցի ժամանակ քաղաքագետ Զարդուշատ Ալիզադեն հայտարարել է, որ Ռուսաստանը կարող է գործի գցել ղարաբաղյան խաղաքարտը՝ British Petroleum-ի (BP) առաջ քաշած նոր գազատարի կառուցումը խափանելու համար, որը ադրբեջանական «Շահ Դենիզ» գազային հանքավայրը կապելու է Թուրքիայի արևմուտքի հետ.
«Եթե BP-ն որոշի իրագործել այդ նախագիծը, ապա ոչ մի խնդիր չի առաջանա։ Բրիտանական ընկերությունը ներկայումս գոյություն ունեցող երկու «ճյուղերին» (երթուղի) կավելացնի երրորդը, ինչը տնտեսապես ավելի էժան կնստի։
Ինչ վերաբերում է նրան, թե նոր գազատարի կառուցմանը ինչպես կարձագանքի Ռուսաստանը, ապա վերջինս տվյալ հարցում չի տիրապետում իրավական ճնշալծակների։ Սակայն, միևնույն ժամանակ, նրա ձեռքում կա մի հզոր լծակ՝ դա Ղարաբաղն է։
Ռուսաստանը կարող է «սեղմել կոճակը» և տարածաշրջանը վերածել անկայուն տիրույթի, ինչն իր հերթին կհանգեցնի գազատարի նախագծի կասեցմանը։ Իմ կարծիքով, Ռուսաստանն այս նոր գազատարին «ավելի մեղմ» կարձագանքի, եթե նրա նախագծում չներառվի Թուրքմենստանը (ապագա «Անդրկասպյան» գազատարը)։ Ռուսաստանի գլխավոր նպատակը կենտրոնասիական տարածաշրջանի հանքավայրեր Եվրոպայի ներթափանցման կանխումն է»։
Հիշեցնենք, որ BP-ի առաջ քաշած նոր նախագիծը ստացել է Հարավարևելյան գազատար անվանումը։ BP-ն նախատեսել է կառուցել Nabucco-ի համեմատ ավելի հարմարավետ ու էժան գազատար, որն ունենալու է 1300 կիլոմետր երկարություն և գոյություն ունեցող ենթակառույցների միջոցով «Շահ Դենիզ»-ը կապելու է Թուրքիայի արևմուտքի հետ, որտեղից էլ ադրբեջանական գազը Բուլղարիայով, Ռումինիայով և Հունգարիայով կհասնի Ավստրիա՝ ինչպես որ նախատեսված է Nabucco-ի պարագայում։
Հարավարևելյան գազատարը փորձում է համատեղել քաղաքականության ու բիզնեսի պահանջները, քանի որ շատ գործարարներ կարծում են, որ մոտ 4000 կիլոմետր երկարությամբ ունեցող Nabucco գազատարը չափազանց քաղաքականացված ու վիթխարի նախագիծ է։ Nabucco գազատարը նախատեսված է ոչ միայն ադրբեջանական գազի, այլև ողջ Կասպյան ավազանի, Իրաքի ու Մերձավոր Արևելքի գազի ներկրման համար։