Հյուսիսային Կորեայի զինվորները, որոնք միացել էին ռուսներին ուկրաինական ուժերի դեմ մարտերում, ծանր կորուստներ կրելուց հետո դուրս են բերվել առաջնագծից։ Այդ մասին գրում է New York Times-ը՝ հղում անելով ուկրաինացի և ամերիկացի պաշտոնյաների:
Հոդվածում նշվում է, որ նոյեմբերին Ռուսաստան մոտ 11,000 հյուսիսկորեական զորքերի ժամանումը տագնապ առաջացրեց Ուկրաինայում և Արևմուտքում նրա դաշնակիցների շրջանում, ովքեր վախենում էին, որ նրանց տեղակայումն ազդարարում է գրեթե երեք տարի շարունակվող պատերազմի զգալի սրացում: Սակայն ընդամենը երեք ամսվա ընթացքում, ըստ Ուկրաինայի բարձրագույն ռազմական հրամանատար, գեներալ Օլեքսանդր Սիրսկիի, Հյուսիսային Կորեայի շարքերը կրճատվել են կիսով չափ։
Հարավային Կորեայի Ազգային հետախուզական ծառայությունը Սեուլում օրենսդիրներին հայտնել է, որ ըստ գնահատականների՝ 300 հյուսիսկորեացի զինվոր է սպանվել, ևս 2700-ը՝ վիրավորվել Ուկրաինայի դեմ մարտերում։
Հյուսիսային Կորեան չի արձագանքել Ուկրաինայի զինված ուժերի կողմից իր զորքերի գերեվարման կամ սպանության մասին հաղորդագրություններին, գրում է New York Times-ը։
