Այսօր ԵՄ պատվիրակության ղեկավար դեսպան Ռաուլ դը Լուցենբերգերի և ՀՀ ազգային անվտանգության խորհրդի քարտուղար Արթուր Բաղդասարյանի համանախագահությամբ անցկացվեց Հայաստանի Հանրապետությունում ԵՄ Խորհրդատվական խմբի Խորհրդի յոթերորդ նիստը: ԵՄ Խորհրդատվական խումբը ներկայացրեց իր հերթական եռամսյակային հաշվետվությունը, ինչպես նաև մինչև այս տարվա վերջ նախատեսված աշխատանքային ծրագիրը:
Նիստի ընթացքում ԵՄ Խորհրդատվական խումբը ներկայացրեց իր հիմնական գործունեության և ձեռքբերումների համառոտ ամփոփումը, այդ թվում Խորը և համապարփակ ազատ առևտրի համաձայնագրի հանդեպ երկփուլ մոտեցման վերաբերյալ կոնսենսուսը, որը ներառում է նախաբանակցային միջոցառումները, ինչպես նաև բանակցությունների մեկնարկից հետո և ընթացքում իրականացվելիք միջոցառումները:
Խորհուրդն ընդգծեց ԵՄ Խորհրդատվական խմբի կարևոր ներդրումը Արդարադատության, ազատության և անվտանգության հարցերով ենթակոմիտեի երկրորդ նիստի ընթացքում և «Հայաստանում սահմանների համալիր կառավարման ռազմավարության և մաքսային բարեփոխումների ծրագրերի իրականացման համար ԵՄ աջակցության ընդլայնման» նախագծի առաջարկի վերջնական տարբերակի ամփոփումը:
Խորհուրդը նաև նշեց 2011թ. հունիս-օգոստոս ժամանակահատվածի համար Խմբի եռամսյակային հաշվետվությունը և հավանություն տվեց մինչև այս տարվա ավարտը նախատեսված աշխատանքների ծրագրին:
ՀՀ ազգային անվտանգության խորհրդի քարտուղար պարոն Արթուր Բաղդասարյանը գոհունակություն հայտնեց Հայաստան-ԵՄ առկա համագործակցության` ժողովրդավարության, առևտրի և տնտեսական հարցեր ընդգրկող լայն շրջանակի վերաբերյալ` ընդգծելով համագործակցության ոլորտների հետագա ընդլայնման անհրաժեշտությունը: Հայաստանում ԵՄ պատվիրակության ղեկավար Ռաուլ դը Լուցենբերգերը հայտնեց, որ ԵՄ Խորհրդատվական խմբի նպատակն է նպաստել փոփոխությանը, արագացնել և հասցեագրել կառավարության բարեփոխումների օրակարգի առաջնահերթությունները:
Նիստին մասնակցել են ՀՀ Նախագահի աշխատակազմի, ՀՀ Կառավարության և ՀՀ Ազգային Ժողովի բարձրաստիճան պաշտոնյաներ: Ներկա էին նաև ԵՄ անդամ պետությունների դեսպանատների և միջազգային կազմակերպությունների, այդ թվում` ՄԱԶԾ ներկայացուցիչներ: ԵՄ Խորհրդատվական խումբը ներկայացնում էին թիմի ղեկավար պրն Անտտի Հարթիքայնենը և ԵՄ խորհրդատուները
