Հունվարի 22-ին Ադրբեջանի պաշտպանության նախարարը ցամաքային զորքերի հրամանատարության, շտաբի, զորամիավորումների հրամանատարների և ծառայության պետերի խորհրդակցություն է անցկացրել: Ի տարբերություն նախորդների՝ այս անգամ միջոցառումը, եթե հավատանք պաշտոնական հաղորդագրությանը, գումարվել է օկուպացված Ստեփանակերտում:
Քառասունչորսօրյա պատերազմից հետո դա Ադրբեջանի պաշտպանության նախարարի Լեռնային Ղարաբաղում գտնվելու մասին առաջին պաշտոնական տեղեկատվությունն է: Ադրբեջանի ռազմական գերատեսչության տարածած հաղորդագրության համաձայն՝ ի թիվս այլոց՝ Զաքիր Հասանովը քննարկել է նաև բարձրլեռնային պայմաններում մարտական հերթապահություն իրականացնող զորամիավորումներում ծառայողական կարգապահության հետ կապված հարցեր:
Անցյալ տարեվերջին ադրբեջանական մամուլում զինծառայողների մահվան կամ հրաձգային զենքից կրակի հետևանքով սպանության մասին մի քանի տեղեկություն է տարածվել: 2023թվականի ձմռանը հայտնի է դարձել Քելբաջարում մի քանի զինծառայողների ձնաբուքի պատճառով անհայտ կորչելու մասին: Որոշ ժամանակ անց նրանք հայտնաբերվել են մահացած:
Ստեփանակերտում Զաքիր Հասանովի անցկացրած խորհրդակցությունից կարճ ժամանակ անց Ադրբեջանի պաշտպանության նախարարությունը հայտնել է զինծառայողի մահվան մասին՝ առանց վկայակոչելու նրա ինքնությունը: Բաքվի ռազմական գերատեսչությունը հավելել է, որ զինծառայողը մահացել է բնակության մշտական վայրում՝ գտնվելով արձակուրդի մեջ: Հաղորդագրության այդ ընդգծումներից դատելով՝ խոսքը սպայի մասին է, բայց թե ինչ հանգամանքներում է նա «մահացել», որևէ մանրամասնություն չի հրապարակվում: Հունվարի 24-ին Ադրբեջանի զինվորական դատախազությունը հայտնել է, որ հրաձգային զենքից կրակի հետևանքով սպանվել է շարքային Ջամալ Հուսեյնովը:
Եվրոպայում գործող MeydanTV առցանց լրատվամիջոցի տեղեկություններով՝ սպանվել է պայմանագրային զինծառայող: Ընդ որում՝ խոսքը հատուկ նշանակության զորամիավորման մասին է, որ մարտական ծառայություն է իրականացնում Հայաստանի հետ սահմանին: Հարուցվել է քրեական գործ, հետաքննությունն իրականացնում է Ադրբեջանի զինվորական դատախազության քննչական խումբը, որին աջակցում է տեղեկատվության և տեխնոլոգիաների կենտրոնը:
Ըստ երևույթին՝ առկա է փորձաքննություն անցկացնելու անհրաժեշտություն՝ պարզելու դեպքի հետ կապված այնպիսի հանգամանքներ, որ կարող են նպաստել «միջադեպի» պարզաբանմանը: Այդուհանդերձ, եթե կատարվածին տրվում է «հրաձգային զենքի կրակով սպանություն» բնորոշումը, հասկանալի է, որ Հուսեյնովը դարձել է ծառայակցի կողմից արձակված կրակոցի թիրախ:
Իսկ դա իր հերթին վկայում է, որ «միջադեպի» պատճառը երկու կամ մի խումբ զինծառայողների միջև ծագած հակասությունն է: Կարելի է ենթադրել, որ հարաբերություններ պարզելու փորձն ավարտվել է կրակոցով, որ դարձել է Հուսեյնովի մահվան պատճառը: MeydanTV-ն գրում է, որ նոր տարում դա ադրբեջանական զինված ուժերում «սպանության երկրորդ դեպքն է»:
Ադրբեջանական լրատվամիջոցը, այսպիսով, սպանություն է համարում նաև «բնակության վայրում արձակուրդի ժամանակ զինվորականը մահը», բայց հավելյալ պարզաբանումներ չի անում:
Դրանից, սակայն, իրականությունը չի փոխվում 2025թ. հունվարին ադրբեջանական զինված ուժերը երկու զինվորականի կորուստ են ունեցել: Ընդ որում՝ երկուսն էլ դարձել են սպանության զոհ: Ադրբեջանում բանակի մասին ամբողջ տեղեկատվությունը համարվում է պետական գաղտնիք: Նույնիսկ սպանվածների հարազատներին է արգելված շփվել մամուլի հետ: Այնուամենայնիվ, որոշ աղբյուրներ կարողանում են արտակարգ դեպքերի մասին թեև ոչ ամբողջական, բայց եզրակացությունների տեղ թողնող տեղեկատվություն տարածել:
