Տուրիզմի մասին խոսելիս պետք է հստակեցնել չափանիշները: Դրանք են՝ հյուրանոցային տեղերի քանակ, ենթակառուցվածքի զարգացում և երկիր ժամանող զբոսաշրջիկների, բայց ոչ արտագնա աշխատանքի մեկնող Հայաստանի նախկին քաղաքացիների թիվ: Խոսքը հստակ վիճակագրության մասին է: Միայն այդ դեպքում կարող ենք ասել` սահմանված են այսինչ նպատակները, ունենք սա: «Առաջին լրատվական»-ի հետ զրույցում, խոսելով ներգնա տուրիզմի մասին, ասաց Հայաստանի տուրիզմի ընկերակցության նախագահ, ոլորտի փորձագետ Արթուր Ոսկանյանը:
Նրա խոսքով` այդ ոլորտում բավարար պարզություն, թափանցիկություն և հստակություն չկա, քանի որ տարաձայնություններ կան վիճակագրության, դրանց հավաքման մեթոդների ու Հայաստան ժամանող մարդկանց թվի հետ կապված:
Ինչ վերաբերում է Հայաստանի` ներգնա տուրիզմի երկիր դառնալու հեռանկարին, ապա, Ոսկանյանի համոզմամբ, Հայաստանը հեռանկարային է, թեև ինքն իրենով երկիրը հեռանկարային չի կարող լինել: «Նպատակաուղղված, հետևողական աշխատանքներ են պետք»,- շեշտեց նա:
Վերջինս կարևորեց նաև տուրիստական հեղինակավոր կազմակերպությունների տարեկան համաժողովների անցկացումը Հայաստանում, ընդգծեց, որ Հայաստանը պետք է նախաձեռնի դրանց անցկացումը: «Մինչև նրանք չգան ու իրենց միջոցառումներն այստեղ չանցկացնեն, դա կնշանակի, որ երկիրն այնքան էլ կարևոր տեղ չի զբաղեցնում՝ իրենց վարկանշային սանդղակում: Տուրիզմի համաշխարհային կազմակերպությունը լավ բան է, բայց դրանով բոլոր հարցերը չեն լուծվում, քանի որ կան այլ կառույցներ ևս: Հստակ քայլեր է անհրաժեշտ ձեռնարկել»,- ասաց մեր զրուցակիցը:
