Ինձ մոտ տպավորություն է, որ Հայաստանի հանրությունը ունի համոզում, որ Հայաստանում կա մեծածավալ կոռուպցիա: Ընդամենը մի քանի օր առաջ, այցելելով Հակակոռուպցիոն կոմիտե, այդպիսի միտք էր արտահայտել վարչապետ Նիկոլ Փաշինյանը: Ինչպես այդ առիթով արդեն անդրադարձել եմ ավելի վաղ հրապարակված հոդվածում, վարչապետ Փաշինյանի այդ հայտարարությունը, ըստ էության, բազմաշերտ ակնարկ էր՝ մի կողմից Հակակոռուպցիոն ղեկավարությանը, մյուս կողմից՝ սեփական քաղաքական թիմին:
Ակնարկի իմաստը, ըստ էության, այն էր, որ հակակոռուպցիոն գործիքը կարող է կիրառվել, եթե Նիկոլ Փաշինյանը թիմում արձանագրի «ներիշխանական սեպարատիզմի» ռիսկեր ու վտանգներ: Հակակոռուպցիոն կոմիտեում Փաշինյանի հայտարարությունից ընդամենը մի քանի օր անց կոմիտեն ձերբակալություններ է իրականացրել Երևանի քաղաքային իշխանությունում: Այսօր ձերբակալվել են Կենտրոն վարչական շրջանի պաշտոնյաներ: Կոմիտեն հայտնել է, որ ձերբակալությունները եղել են ավելի վաղ հարուցված քրգործի շրջանակում:
Այլ մանրամասներ չեն ներկայացվել, այդ թվում՝ ձերբակալվածների ինքնության մասով: Փաստորեն, Հակակոռուպցիոն կոմիտեն արագորեն հասկացել է Նիկոլ Փաշինյանի ակնարկն ու անցել գործի, առնվազն Փաշինյանի հայտարարությունների լրջությունը ցույց տալու համար: Իսկ ինչ և ինչպես է հասկացել քաղաքական թիմը, բնականաբար տեսանելի կլինի այդ թիմի վարքագծից: Անշուշտ, Հայաստանում այսօրինակ ձերբակալություններն աննախադեպ չեն, սակայն հանգամանքը, որ դրանք իրականացնում է Հակակոռուպցիոն կոմիտեն և անում է դա վարչապետի այցից ու հայտարարություն-«հանձնարարությունից» շատ կարճ ժամանակ անց, միտված է, իհարկե, ցույց տալու, որ տեղի ունեցողը կապված է հենց վարչապետի հայտարարության հետ: Այլ կերպ ասած, դա հենց թիմին ուղղված ցուցադրական գործողություն է:
Ընդ որում՝ հատկանշական է, որ այն ուղղվում է Երևանի քաղաքային իշխանության հասցեով: Հարկ է նկատել, որ կարող էր լինել ցանկացած այլ ուղղություն՝ հարկ եղած դեպքում: Եվ հատկանշական է այն, որ Երևանի քաղաքային իշխանության ուղղությամբ Հակակառուպցիոն կոմիտեի գործողությունը տեղի է ունենում մի ժամանակահատվածում, երբ այդ իշխանությունը տրանսպորտային այսպես կոչված ռեֆորմի առնչությամբ գտնվում է հանրային մեծ դժգոհության թիրախում: Փաստորեն, այդ դժգոհությանը զուգահեռ, քաղաքային իշխանությանը թիրախավորում է նաև Հակակառուպցիոն կոմիտեն՝ Նիկոլ Փաշինյանի հայտարարության «հետքով»: Սակայն բացառել պետք չէ, որ Փաշինյանն այդպիսով սահմանում է «կեղծ» թիրախ՝ գործնականում այդ կերպ փորձելով «թակարդ» պատրաստել ներիշխանական որևէ իրական թիրախի «բնից հանելու» համար:
