Հոկտեմբերի 22-ին Կազանում բացվում է ԲՐԻԿՍ-ի գագաթաժողովը: Այն, ինչպես գրում է «Նեզավիսիմայա գազետան»՝ ցույց կտա, թե Ռուսաստանն արդի աշխարհում ինչ տեղ է զբաղեցնում: Գագաթաժողովին չի մասնակցի կազմակերպության հիմնադիր անդամ Բրազիլիայի նախագահը, իսկ Հնդկաստանի վարչապետը միայն հոկտեմբերի 18-ին է հաստատել իր մասնակցությունը: Ըստ տեղեկությունների, Չինաստանի նախագահ Սի Ծինփինը Կազանում կմնա մինչև վերջ, ինչից հասկացվում է, որ այլ մասնակիցներ կարող են մասնակցել միայն առաջին օրվա աշխատանքներին:
Հետխորհրդային տարածքի երկրներից ԲՐԻԿՍ-ի գագաթաժողովին կմասնակցեն Բելառուսը, Ղազախստանը, Ուզբեկստանը և Ադրբեջանը՝ նախագահների մակարդակով: Հայաստանը կներկայացնի վարչապետ Նիկոլ Փաշինյանը:
Ռուսաստանի նախագահի արտաքին քաղաքական հարցերով օգնական Յուրի Ուշակովը ՏԱՍՍ-ին ներկայացրել է գագաթաժողովի շրջանակներում Վլադիմիր Պուտինի հանդիպումները: Ըստ այդմ` Պուտին-Ալիև և Պուտին-Փաշինյան հանդիպումներ նախատեսված չեն:
Ուշակովն ասել է, որ Ռուսաստանի նախագահը կարող է անցկացնել նաև այլ հանդիպումներ՝ առանց մանրամասնելու, թե խոսքն ում է վերաբերում կամ ինչ ձևչափի: Այս իմաստով բավական ենթատեքստային է լրատվամիջոցներից մեկի ձևակերպումը, որ «Կազանում կգտնվի Ստամբուլում վերջերս կայացած հայ-ադրբեջանական բանակցությունների միջնորդ երկրի՝ Թուրքիայի նախագահ Ռեջեպ Թայիփ Էրդողանը»:
Կազանում Պուտին-Էրդողան հանդիպում նախատեսված է: Ըստ երևույթին՝ այդ բանակցությունները շոշափելու են նաև Հարավային Կովկասի, հայ-ադրբեջանական կարգավորման, հաղորդուղիների հետ կապված հարցեր: Ծրագրված է նաև ՌԴ և Իրանի նախագահների հանդիպում:
Թեև Մոսկվայում Իրանի դեսպանն ասել է, որ համապարփակ համագործակցության մասին պայմանագրի ստորագրում նախատեսված չէ, ռուսաստանյան մի շարք լրատվամիջոցներ համարում են, որ այդ հնարավորությունը կա:
Վարչապետ Նիկոլ Փաշինյանին հրավիրելով Կազան՝ Վլադիմիր Պուտինն ասել է, որ ԲՐԻԿՍ-ի գագաթաժողովին նրա մասնակցությունը և՛ օգտակար կլինի, և՛ հետաքրքիր։ Եթե Պուտին-Փաշինյան և Պուտին-Ալիև հանդիպումներ նախատեսված չեն, ապա ո՞րն է Փաշինյանի Կազան մեկնելու օգտակարությունը: Հետաքրքիր կարող է լինել միջազգային ցանկացած խորհրդաժողով:
Հոկտեմբերի 18-ին Հայաստանի և Ադրբեջանի արտաքին գործերի նախարարները Ստամբուլում մեկ ժամ տևած քննարկումներից հետո համաձայնել են լրացուցիչ ջանքեր գործադրել՝ հասնելու հայ-ադրբեջանական պայմանագրի ստորագրմանը: Երեք օր անց ԱՄՆ նախագահի հատուկ օգնական Կարպենտերը Բաքվում Ալիևին է փոխանցել Բայդենի նամակը, որով նաև հորդորում է մինչև տարեվերջ Հայաստանի հետ խաղաղության պայմանագիր ստորագրել:
Ռուսաստանյան լրատվամիջոցն ինչո՞ւ է ակնարկում, որ հայ-ադրբեջանական վերջին բանակցությունների միջնորդը Թուրքիան է և Էրդողանի Կազանում գտնվելը գնահատում այդ իմաստով: Կարելի՞ է ենթադրել, որ Հայաստանի և Ադրբեջանի առաջնորդների հետ Պուտինի հանդիպման նպատակահարմարությունը պարզ կլինի նրա և Թուրքիայի ու Իրանի նախագահների հետ բանակցություններից հետո: Ըստ երևույթին՝ կազանյան հարթակում Հարավային Կովկասի ստատուս քվոյի շուրջ լայն համաձայնության հասնելու ռուսաստանյան նախագծումը Թեհրանում և Անկարայում աջակցություն չի գտել: Ի՞նչ այլընտրանք է հնարավոր:
