ՄԱԿ-ի գլխավոր քարտուղար Անտոնիո Գուտերեշը դիմել է ՄԱԿ-ի կանոնադրության՝ հազվադեպ կիրառվող 99-րդ հոդվածին և խնդրել, որ Անվտանգության խորհուրդը միջամտի՝ Գազայի հատվածում վերահաս «հումանիտար աղետը» կանխելու համար։ Իսրայելը Գուտերեշի այս հայտարարությունը համարել է կողմնակալ վերաբերմունք։ Այս մասին հաղորդում է Associated Press-ը։
15 անդամներից բաղկացած Անվտանգության խորհրդին իր նամակում Գուտերեշը գրել է․ «Միջազգային հանրությունը պատասխանատվություն ունի՝ օգտագործել իր ողջ ազդեցությունը՝ կանխելու հետագա էսկալացումը և վերջ դնելու այս ճգնաժամին»։
Անվտանգության խորհրդի անդամներից Արաբական Միացյալ Էմիրությունները որոշման նախագիծ է մշակել, որով նախատեսվում է գործողությունների դիմել՝ համապատասխան Գուտերեշի նամակի, մասնավորապես՝ անմիջապես հումանիտար հրադադար հաստատել։ Սակայն ԱՄՆ-ն, որն Իսրայելի մտերիմ դաշնակիցն է, Անվտանգության խորհրդում վետոյի իրավունք ունի և չի աջակցում հրադադարին։
ՄԱԿ-ում Իսրայելի դեսպան Գիլադ Էրդանը հայտարարել է, որ գլխավոր քարտուղարը դիմել է 99-րդ հոդվածին, որպեսզի ճնշում գործադրի Իսրայելի վրա։ Էրդանը Գուտերեշին մեղադրել է Իսրայելի դեմ կողմնակալության համար։
«Հրադադար հաստատելու՝ գլխավոր քարտուղարի կոչն իրականում կոչ է՝ Գազայում պահելու ՀԱՄԱՍ-ի ահաբեկման իշխանությունը», – հայտարարել է Էրդանը։
ՄԱԿ-ի գլխավոր քարտուղարի խոսնակ Ստեֆան Դյուժարիկը BBC Radio 4-ի «Today» ծրագրին հարցազրույցում հերքել է այն մեղադրանքները, թե կազմակերպությունը կողմնակալ է Իսրայելի նկատմամբ։
«Միակ կողմը, որին մենք աջակցում ենք, կյանքեր փրկելու կողմն է», – ասել է Դյուժարիկը:
Դյուժարիկը խոստովանել է, որ Գուտերեշի միջամտությունը չափազանց հազվադեպ քայլ է, սակայն նա ստիպված է եղել դա անել «մարդկային տառապանքի մասշտաբների» պատճառով։
