ՀԱՊԿ գլխավոր քարտուղար Իմանղալի Տասմաղամբետովը Մինսկում կազմակերպության գագաթնաժողովից հետո կայցելի Երևան, որպեսզի Մինսկում կայացված որոշումները ներկայացնի Հայաստանի հավանությանը: Ինչպես հայտնի է, ՀԱՊԿ կազմակերպություն է, որտեղ որոշումները կայացվում են կոնսենսուսով, եւ անկախ այն բանից՝ Հայաստանը մասնակցում է Վեհաժողովին, թե ոչ, որոշումների հաստատումը առանց Հայաստանի հնարավոր չէ: Ըստ այդմ, առաջանում է հարց՝ Հայաստանը, որ իր դժգոհությունն է հայտնում ՀԱՊԿ վերաբերմունքից եւ հրաժարվում է մասնակցել ՀԱՊԿ հավաքներին՝ թե վարչապետի, թե պաշտպանության եւ արտգործնախարարների մակարդակներով, մասնակցելու՞ է ՀԱՊԿ որոշումների կայացմանը, թե՞ ոչ:
Ինչպես հայտնի է, Մինսկի հանդիպումից առաջ Երեւանը խնդրել է օրակարգից հանել Հայաստանի օգնության փաթեթը: Բայց, օրակարգում են նաեւ այլ հարցեր, հետեւաբար Հայաստանը կամ պարզապես տորպեդահարում է ՀԱՊԿ աշխատանքը, կամ մասնակցում այդ աշխատանքին եւ հավանության արժանացնում Մինսկի Վեհաժողովի որոշումները, ինչը նշանակում է ըստ էության անուղղակի, հեռակա մասնակցություն այդ վեհաժողովին եւ աշխատանքին: Սա մեծ հաշվով ստանում է որոշակի «վերջնագրային» իրավիճակ եւ փաստացի կարող է գործ ունենք մի իրավիճակի հետ, երբ ֆորմալ առումով ժամանելով Հայաստան Մինսկի որոշումները Երեւանի հաստատմանը ներկայացնելու՝ ինչպես հայտնում է ՀԱՊԿ ԳՔ-ն եւ ինչպես ըստ նրա պայմանավորվել են Հայաստանի արտգործնախարարի հետ, բուն, խորքային իմաստով այդուհանդերձ նա Երեւան է ժամանում «վերջնագրային» տրամաբանությամբ՝ ՀԱՊԿ-ու՞մ եք, թե՞ ՀԱՊԿ-ում չեք:
Ըստ էության, այս մասին խոսեցի նախօրեին, Կրեմլի խոսնակ Պեսկովի այն հայտարարույթյան առիթով, որտեղ նա «հույս է հայտնում», որ Երեւանը կշարունակի աշխատանքը ՀԱՊԿ-ում, թեեւ չի մասնակցում Մինսկի Վեհաժողովին: Պեսկովի այդ հայտարարոթյունը գնահատել էի այն տրամաբանության շրջանակում, որ ՀԱՊԿ կարող է «թասիբի է գցում» Հայաստանին, այսպես ասած սրում է կոնտրաստ՝ միջոցառումներին չմասնակցելու, բայց աշխատանքը շարունակելու, ինչը քաղաքական իմաստով արժեզրկում է Հայաստանի չմասնակցելը եւ փաստացի «դրդում» պարզապես ՀԱՊԿ անդամակցությունը դադարեցնելու որոշման: Եթե Երեւանը մտադիր էր դրան գնալ «սահուն», «թավշյա» ճանապարհով, ապա կարծես թե ՀԱՊԿ-ն ի պատասխան արագացնում է գործընթացը:
