Նոյեմբերի 22-ը բավականին ուշագրավ օր է եղել Հայաստան-ԵՄ հարաբերության առումով: Նախ տեղեկություն տարածվեց, որ Հայաստանի փոխվարչապետեր Տիգրան Խաչատրյանն ու Մհեր Գրիգորյանը հանդիպել են Հայաստանում հավատարմագրված ԵՄ ռեզիդենտ եւ ոչ ռեզիդենտ դեսպանների ու Եվրամիության ներկայացուցչի հետ, քննարկելով թե Արցախից բռնի տեղահանվածներին աջակցության, թե Հայաստան-ԵՄ տնտեսական ու քաղաքական հարաբերության առնչվող հարցեր: Դրանից հետո եղավ տեղեկություն, որ Հայաստանում հավատարմագրված ԵՄ ռեզիդենտ եւ ոչ ռեզիդենտ դեսպանների հետ հանդիպել է Հայաստանի ԱԽ քարտուղար Արմեն Գրիգորյանը, քննարկելով ռեգիոնալ անվտանգային իրողությունները: «Կողմերն անդրադարձ են կատարել տարածաշրջանային անվտանգային վերջին զարգացումներին:
ՀՀ ԱԽ քարտուղարը ներկայացրել է հայ-ադրբեջանական հարաբերությունների կարգավորման բանակցային ընթացքը և խաղաղ կարգավորման հնարավորությունները», մասնավորապես ասված է ԱԽ գրասենյակի տարածած հաղորդագրությունում: «Փոխվարչապետ Մհեր Գրիգորյանը գործընկերներին ներկայացրել է տարածաշրջանային հնարավոր զարգացումների տարբեր սցենարների համատեքստում Հայաստանին սպասվող հավանական մարտահրավերները, դրանց հաղթահարման ուղիները, ինչպես նաև անդրադարձել է ՀՀ-ԵՄ հարաբերությունների օրակարգային հարցերին», հայտնում է փոխվարչապետների ու ԵՄ դեսպանների հանդիպման վերաբերյալ պաշտոնական հաղորդագրությունը: Ըստ ամենայնի, Երեւանը երկու առանձննահատուկ մակարդակով էական ուղերձներ է հղել Եվրամիության ռեզիդենտ եւ ոչ ռեզիդենտ երկրների դեսպաններին:
Դժվար է մտածել, որ նրանց հետ թե փոխվարչապետերի, թե ԱԽ քարտուղարի մակարդակով նույն օրը տեղի ունեցած երկու հանդիպումները պարզապես համընկել են ժամանակագրական առումով: Երկու մակարդակում այդ ներկայացուցչական հաղորդակցությունը թերեւս պայմանավորված է բավականին շոշափելի շարժառիթով: Իսկ դրանք այսօր այսպես, թե այնպես գրեթե առանց բացառության առնչվում են անվտանգության խնդիրներին, եւ հարցն այն է, թե ինչ աստիճանով եւ անմիջականությամբ: Հատկանշական է նաեւ, որ այդ հանդիպումները հաջորդում են փաստորեն այն տեղեկությանը, որ տարածեց Երեւանը՝ Ադրբեջանին խաղաղության պայմանագրի նախագծի վերաբերյալ առաջարկների վեցերորդ փաթեթը փոխանցելու մասին:
