Աշխատանքի տեղավորվելիս անհրաժեշտ է պահանջել շատ բարձր աշխատավարձ` նույնիսկ իմանալով, որ գործատուն չի համաձայնի նման պահանջի հետ: Այս մասին գրում է Time ամսագիրը` նշելով, որ նման եզրակացության է եկել Այդահոյի համալսարանի հոգեբան Թոդ Թորսթեյնսոնը, որն ապացուցել է այս համոզմունքը փորձի միջոցով:
Թորսթեյնսոնը սովորական օֆիսային աշխատանքի համար դիմող կամավորներին, որոնք ձևացրել են, թե աշխատանք են փնտրում, հանձնարարել էր պահանջել 100 հազար դոլար այն դեպքում, երբ մինչ այդ նույն պաշտոնի աշխատակիցները ստացել են 29 հազար: Արդյունքում պարզվել է, որ բարձր աշխատավարձ պահանջողներին առաջարկվել է սովորականից 9%-ով ավելի բարձր աշխատավարձ:
«Իհարկե, անհնար է կանխագուշակել, թե ինչպես կարձագանքի գործատուն բարձր աշխատավարձի պահանջին, որ երբեմն ծիծաղ է հարուցում: Սակայն փորձը որոշ բան ասում է մարդկային էության և բանակցությունների մեխանիզմների մասին»,- ասվում է ամսագրում տպագրված հոդվածում:
