Ֆրանսիայի արտգործնախարար Կատրին Կոլոննան հայտարարել է, որ հոկտեմբերի 3-ին այցելելու է Հայաստան: Նա չի ասել, թե արդյո՞ք լինելու է այց միայն Հայաստան, թե՞ նաև Ադրբեջան, և գուցե նույնիսկ Վրաստան: Ընթացիկ տարվա ապրիլի վերջին Կոլոննան ռեգիոնալ այցով ժամանել էր Երևան, Թբիլիսի և Բաքու, որի ընթացքում էլ հայտարարեց, որ Փարիզը մտադիր է կազմակերպել Հայաստանի և Ադրբեջանի ղեկավարների հանդիպում Քիշնևում, որտեղ տեղի էր ունենալու Ֆրանսիայի նախաձեռնությամբ հիմնված Եվրոպական քաղաքական համայնքի երկրորդ Վեհաժողովը:
Առաջինը եղավ Պրահայում՝ 2022-ի հոկտեմբերի 6-ին, որտեղ կայացավ քառակողմ հանդիպումը ու եղան հայտնի պայմանավորվածությունները՝ Ջերմուկի դեմ ադրբեջանական հարձակումից հետո: Քիշնևում սակայն եղավ ոչ թե քառակողմ այլ հնգակողմ հանդիպում՝ Գերմանիայի կանցլեր Շոլցի մասնակցությամբ: Այժմ սպասվում է նույն նախաձեռնության երրորդ վեհաժողովի շրջանակում հնգակողմ նոր հանդիպում՝ Գրանադայում, հոկտեմբերի 5-ին: Այդ հանդիպումից առաջ էլ Ֆրանսիայի արտգործնախարարը հայտարարում է Հայաստան այցի մասին, ոչինչ չասելով Հայաստանից բացի նաև Ադրբեջան այցելելու հավանականության կամ հնարավորության մասին:
Կասկածից վեր է, որ Կոլոննայի այցը կապված է հոկտեմբերի 5-ի հանդիպման հետ: Եվ, եթե այդ հանդիպումից առաջ նա հայտարարում է Հայաստան այցի մասին, ապա, միայն Հայաստանով սահմանափակվելը կնշանակի, որ Ֆրանսիայի արտգործնախարարն այցի ընթացքում փորձելու է Երևանում ստանալ որոշակի համաձայնություններ Գրանադայի հանդիպման բովանդակության առնչությամբ: Այդ իմաստով, միայն Հայաստան այցը կլինի որոշակիորեն մտահոգիչ, հատկապես հաշվի առնելով այն, որ Գրանադային նախորդել է նաև Բաքվի ագրեսիան Արցախի դեմ, փաստացի հայաթափումը՝ ոչ միայն ռուս խաղաղապահների չմիջամտության, այլ նաև միջազգային մյուս բոլոր դերակատարների լռության ներքո, և Ադրբեջանն ըստ էության դրանով ստացել է քաղաքական դիրքային առավելություն, առավել «մոտենալով» անմիջապես Հայաստանին առնչվող հարցերին: Այդ նոր իրավիճակում ի՞նչ օրակարգով է Գրանադայից առաջ Հայաստան գալիս Ֆրանսիայի արտգործնախարարը: Ի վերջո, այդ այցը կարող է լինել անշուշտ նաև հաջակցություն Հայաստանի, բայց այդ դեպքում հարց կառաջանա, թե դա չի՞ նշանակի Գրանադայից առաջ Ադրբեջանի դիրքի կարծրացում, և ո՞րը կլինի «էֆեկտն» այդ դեպքում:
