Հասարակությունը իր ամբողջ ուժով, նվիրումով, կարեկցանքով, սիրով և ջերմությամբ, միաժամանակ Արցախի հայաթափման ցավից ատամները սեղմած միացել է Հայաստան տեղափոխվող արցախահայության օգնության գործին: Այդ իրավիճակը ամբողջ «հասակով» ի ցույց է դրել հանրության այն լավագույն որակները, որ կան մեզանում, սակայն առօրյա կյանքում մեծ մասամմբ գտնվում են «հատակին ընկած»: Եվ դրա պատճառն այն է, որ չեն գտնվում այդ «հատակին ընկածը» բարձրացնելու կամք, միտք, խորագիտություն, հմտություն ունեցող սուբյեկտներ, որոնք կազմում են Հայաստանի հասարակական-քաղաքական միջավայրը: Այդ միջավայրի սուբյեկտների ճնշող մեծամասնությունը պարզապես տարիներ շարունակ եղել է անընդունակ, ու առ այսօր մեծ հաշվով անընդունակ է հանրային այդ որակները առօրյա կյանքում վեր բարձրացնելու և կապիտալիզացնելու հարցում:
Ավելի քան երկու տասնամյակ Հայաստանի հանրային քաղաքականությունը, ներքաղաքական կյանքը գերազանցապես կառուցվել է հանրային արատների խրախուսման վրա, ինչի հետևանքով մենք ստացել ենք պետական մեծ անկում, իսկ հանրության լավագույն որակները վեր են բարձրացել միայ արտակարգ իրավիճակների ընթացքում առավելապես ինքնապաշտպանական բնազդի ուժով: Առօրյա կյանքում այդ ուժը չի կարող պահել դրանք, պահանջվում է կամքի, հմտության, մտքի, բարոյականության, հանրային համակեցության մշակույթի ուժ: Հայաստանը պետական անկման կորագծից դուր կգա միայն այդ հատկանիշների հանրային գերակայության մեխանիզմների և միջավայրերի ձևավորման պարագայում, որոնց շնորհիվ հասարակական-քաղաքական կյանքի գերակայությունը կկազմեն վերը հիշատակածս հատկանիշները, դրանք կբնութագրեն հանրային ընթացքը, հանրային քաղաքականությունը կկառուցվի այդ ստեղծարար հենակետերով:
Այդ հանգամանքը վերստին ի ցույց է դնում քաղաքական, տնտեսական, մշակութային վերնախավերի ձևավորման հրամայականը: Վերնախավեր, որոնք կլինեն դրանք ներկայացնող անհատների ներուժը բազմապատկող համակարգային, ինստիտուցիոնալ կառուցվածքով: Այդ խնդիրների լուծումը թույլ կտա հիմնովին նվազեցնել այն արտակարգ իրավիճակների հավանականության ռիսկերը, որոնք արդեն բնազդային, ինքնապաշտպանական մղումով վեր կհանեն հանրային լավագույն որակները: Դրանք վերևում կլինեն առօրյա ընթացքում, ինչը կլինի բարդ ճանապարհներով հասարակական-պետական մեքենայի առավելագույնս սահուն ընթացք ապահովող առանցքային հանգամանքը:
Լուսանկարը՝ hetq.am-ի
