Հայաստանի կառավարության տրամադրած կեցավայրերից արդեն օգտվել է Լեռնային Ղարաբաղից բռնի տեղահանված 32 հազար 200 քաղաքացի:
Այս մասին «Հումանիտար կենտրոն»-ում ասուլիսում հայտարարեց ՀՀ վարչապետի մամուլի քարտուղար Նազելի Բաղդասարյանը:
Նա հիշեցրեց, որ կառավարությունն այս պահին բոլորին առաջարկում է անվճար կեցավայրեր, որոնք կլինեն կարճաժամկետ, որից հետո արդեն համապատասխան ծրագրով նախատեսվում են երկարաժամկետ և միջնաժամկետ ծրագրեր՝ բնակեցման հետ կապված:
«Եթե նախօրեին առավոտյան ժամը 10:00-ի դրությամբ պետության կեցավայրերից օգտվել էր 20 հազար 306 անձ, ապա այսօր այդ թիվը կազմում է 32 հազար 200»,-ասաց Բաղդասարյանը:
Նա ներկայացրեց տեղաբաշխումն ըստ մարզերի. Արագածոտն՝ 1852, Արարատ՝ 7640, Արմավիր՝ 3009, Գեղարքունիք՝ 2862, Լոռի՝ 1581, Կոտայք՝ 8289, Շիրակ՝ 1317, Սյունիք՝ 2244, Վայոց ձոր՝ 1700 և Տավուշ՝ 1706:
