Ադրբեջանի ԱԳՆ խոսնակ Հաջիզադեն հայտարարել է, որ Աղդամի ճանապարհով ռուսական մարդասիրական օգնության բեռների մուտքը Արցախ դրական և կարևոր տեղաշարժ է այդ ճանապարհի բացման ուղղությամբ: Ըստ խոսնակի, Բաքուն ԱՄՆ ու միջազգային գործընկերների հետ բարձր մակարդակի քննարկումներում համաձայնել է Աղդամի և Լաչինի ճանապարհների միաժամանակ գործարկմանը: Երկու ճանապարհների միաժամանակ գործարկման կոչ Միացյալ Նահանգներն անում է պետքարտուղարի, ԱՄՆ ՄԶԳ տնօրենի, նաև պետքարտուղարության խոսնակի մակարդակով: Դրանք հնչել են վերջին երկու օրերի ընթացքում:
Հանրային հեռուստաընկերությանը տված հարցազրույցում Նիկոլ Փաշինյանը հայտարարեց, որ հայկական կողմն աշխատում է Արցախի մարդասիրական իրավիճակի հարցը քաղաքական հարթությունից հնարավորինս դուրս բերելու ուղղությամբ, որպեսզի քաղաքական դիրքորոշումները չդառնան մարդասիրական լուծումների խոչընդոտ: Ընդ որում, այստեղ խնդիրը լոկ Հայաստանի, Արցախի ու Ադրբեջանի դիրքորոշումների մասին չէ, որտեղ հայկական կողմի և Բաքվի մոտեցումները էապես տարբեր են: Այստեղ խոսքը նաև այն մասին է, որ էապես տարբեր քաղաքական մոտեցումներ և շարժառիթներ ունեն նաև ուժային կենտրոնները, որոնք միջնորդական զանազան հավակնություններով փորձում են էական դեր ունենալ իրավիճակի կառավարման հարցում: Իսկ այդ հանգամանքը բերում է մի իրադրության, երբ քաղաքական տարբեր մոտեցումներից ելնելով այս կամ այն կողմը փորձում է տորպեդահարել որևէ համաձայնության հեռանկար, որը չի բխում իր մոտեցումներից և նպատակներից, կամ համարժեք չէ դրանց:
Ահա թե ինչու է կարևոր, որ մարդասիրական խնդիրը առավելագույնս դուրս բերվի քաղաքական տիրույթից, այդպես առավել մոտեցնելով փոխադարձ ընդունելի լուծումների: Մասնավորապես, ինչպես օրեր առաջ ինքս էի շոշափել՝ արժե թերևս դիտարկել երկու ճանապարհների բացման հնարավորությունը՝ ՄԱԿ հովանու ներքո: Ըստ էության, եթե դա տեղի ոունենա Կարմիր խաչի հովանու ներքո, այդ նշանաբանով մարդասիրական առաքումներ սկսեն դեպի Արցախ, կանոնավոր կերպով, ապա դա ևս կարող է լինել ընդունելի միջանկյալ որոշում՝ Արցախում մարդասիրական աղետի ծավալում թույլ չտալու համար: Բայց, այստեղ չափազանց կարևոր է ոչ միայն համաձայնությունը քաղաքական տիրույթից դուրս բերելն ու դրա կայացմանը հասնելը, այլ նաև իրագործումը, որպեսզի հետագայում քաղաքական անհամաձայնությունները, որոնք անկասկած պահպանվելու են, շարունակվելու են, չդառնան մարդասիրական մեխանիզմի աշխատանքը վերստին խոչընդոտելու նոր առիթ կամ շարժառիթ, ինչից հետո արդեն կպահանջվի նոր համաձայնություն՝ նոր գնով:
