«Առաջին լրատվականի» այն հարցին, թե ինչո՞վ է Համահայկական բանկի բացումը նշանակալի ՀՀ տնտեսության և ֆինանսական համակարգի համար, 1994-98 թթ. ՀՀ ԿԲ նախագահ Բագրատ Ասատրյանը պատասխանեց.
«Ըստ իս` Համահայկական բանկի ստեղծումը նշանակալի է իր անհեթեթությամբ և անտրամաբանականությամբ: Մենք ունենք ձևավորված արդի բանկային համակարգ` զարգացած օրենսդրությամբ և արդյունավետ գործող հաստատություններով: ՀՀ բանկային համակարգը, տնտեսության այլ ճյուղերի համեմատ, զարգանում է առաջընթաց տեմպերով, կայուն է և հուսալի: Հիմա առանձին օրենքի հիման վրա ստեղծվում է մի առևտրային կառույց, որը դուրս է արդյունավետ գործող համակարգի ճարտարապետությունից: ՀՀ բանկային համակարգը, ինչպես հայտնի է, երկմակարդակ է. առաջին մակարդակը Կենտրոնական բանկն է, մի ձեռնարկություն, որն օժտված է որոշակի պետական գործառույթներով, երկրորդ մակարդակում առևտրային բանկերն են, որոնք գործում են օրենսդրությամբ սահմանված միասնական կանոնների շրջանակում»:
Այժմ ստեղծվել է մի կառույց, որը ենթակա չէ վերջին միջազգային փորձաքննություն անցած ու ժամանակի փորձությանը լավագույնս դիմակայած օրենսդրությանը: Ավելին, Համահայկական բանկի մասին օրենքում ասվում է, որ անգամ միջազգայնորեն ճանաչված բանկային կարգավորման հիմնական տարրերը` տնտեսական նորմատիվները, առհասարակ չեն տարածվում այս «սուպերկառույցի» վրա: Առհասարակ պետք է խուսափել «համահայկական» բառից. փողը, կապիտալը միջազգային են, պետք է ձգտել միջազգայնացման: Փողի հաջողությունը նրա միջազգային լինելու մեջ է: Երբ փողի, կապիտալի, բանկի վրա գավառամտորեն դրվում է նեղ ազգային անուն, աներկբայորեն այն դատապարտված է ձախողման: Պետք է ձգտել, որ մեր բանկերը դառնան վեր ազգային, և ոչ թե նեղ ազգային,- ասաց Բագրատ Ասատրյանը:
Մենք չգիտենք` ինչ արտոնություններ է սրան տալու նրա հիմնադիրը հանդիսացող ՀՀ ԿԲ-ն: Սակայն մի բան անվիճելի է. այս բանկը ստեղծվում է հասարակության փողերով, ուրեմն հասարակությունը իրավունք ուներ մինչև բանկի ստեղծումը (ինչ վերամբարձ անունով էլ այն հորջորջվի) պարզորոշ իմանալու, թե հանրային նշանակության ինչ ծրագրերի իրականացման նպատակով է այն ստեղծվում:
Սա մեռելածին պտուղ է, ի սկզբանե տեսանելի է, որ ապագա չունի: Սկզբունքորեն անընդունելի եմ համարում հասարակության ֆինանսական սուղ միջոցների ներդրումը սփյուռքի գործոնը շահարկող նման դատարկ և վտանգավոր ձեռնարկի մեջ,- եզրափակեց ԿԲ նախկին նախագահը:
