Դիլիջանում անց է կացվում «Հայ Մշակութային և Գիտական Ընկերակցության» երկրորդ տարեկան համաժողովը, որին մասնակցում են 349 գիտնականներ և փորձագետներ՝ Հայաստանից և աշխարհից։ Նրանցից 146-ը միջոցառմանը ներկա են անձամբ, մյուսները մասնակցում են ուղիղ հեռարձակման միջոցով։
Համաժողովի քննարկվելիք թեմաները բազմաբևեռ են՝ աշխարհաքաղաքական, տնտեսական և անվտանգային մարտահրավերներից մինչև արհեստական բանականություն, կենսատեխնոլոգիաներ, վերականգնողական բժշկություն և շատ ավելին։ Համաժողովին մասնակցելու համար Հայաստանում է Ժնևի համալսարանի դասախոս, միջազգային հարաբերությունների փորձագետ Վիգեն Չետերյանը
«Առաջին լրատվական»-ի հետ զրույցում Վիգեն Չետերյանն անդրադարձել է Ռուսաստանում տեղի ունեցող իրադարձություններին։
«Ռուսաստանում Պուտինի համակարգի քանդման հաջորդ քայլն է սա. այդ քանդումը սկսվել է ոչ միայն Ուկրաինա ներխուժելու կոնտեքստում, այլ նույնիսկ ավելի առաջ»,-նշել է Չետերյանը՝ անդրադառնալով ՌԴ-ում տեղի ունեցած վերջին զարգացումներին:
«Պուտինը իշխանության է արդեն 23 տարի և այսօր այդ իշխանիկի աշունն է: Պուտինը ստեղծել է մի համակարգ, որ միայն Պուտինը կարող է ղեկավարել և եթե ինքը չլինի, այդ համակարգը չի աշխատելու, պետք է վերաքանդվի և վերակազմվի: Այնպես որ, այն ինչ տեղի ունեցավ նախորդ շաբաթավերջին, այդ մեծ համատեքստի մեջ է, և Ուկրաինայում պատերազմի համատեքստում, որտեղ Ռուսաստանի բանակը մեծ դժվարություն ունի: Սա մի պատահար էր, որ այդ քանդման պրոցեսի մեջ է:
Հայաստանի տեսանկյունից քաղաքականություն փոխելու շատ բան չկա, քանի որ Հայաստանը արդեն գիտեր, որ այդ կայսրությունը, որ երկար ժամանակ ՀՀ-ի ռազմական դաշնակիցն էր, դաշնակից լինելու հրաժարվել է 2020-ի պատերազմից ի վեր: Այդ վերանայման քաղաքականությունը հստակ անցած տարիներին սկսվել է, պետք է ավելի վաղ սկսվեր»,-ասաց նա:
