Իսրայելական Zman կայքի փոխանցմամբ՝ Իսրայելի արտգործնախարար Ավիգդոր Լիբերմանն առաջ է քաշել իսրայելական կողմի պլանը, որը ներառում է մի շարք միջոցներ՝ ի պատասխան Թուրքիայից իսրայելցի դիվանագետների արտաքսման և այդ երկրի վարչապետ Ռեջեփ Թայիփ Էրդողանի ագրեսիվ հռետորիկայի։
Իսրայելական պլանը բաղկացած է մի քանի փուլերից, որոնցից առաջինը Թուրքիա այցելել պատրաստավող իսրայելցիներին զգուշացնելն է։ Դա մասնավորապես վերաբերում է ՑԱԽԱԼ-ի ծառայողներին։ Սա պայմանավորված է այն մտահոգությամբ, թե թուրքերը կփորձեն նրանց պահել օդանավակայաններում։
Իսրայելի ԱԳՆ-ի պլանի 2-րդ փուլի մեջ է մտնում թուրքերի պատմական հակառակորդ հայերի հետ համագործակցությունը։ Ունեցած տեղեկությունների համաձայն՝ Լիբերմանը պատրաստվում է ԱՄՆ կատարելիք այցի շրջանակներում հանդիպում ունենալ տեղի հայկական լոբբիի առաջնորդների հետ։
Բացի այդ, Լիբերմանը պլանավորում է հանդիպումներ անցկացնել Եվրոպայում գործող քուրդ ընդհատակյա գործիչների հետ՝ բոլոր մակարդակներում նրանց հետ կապերն ամրագրելու համար։ Ենթադրվում է, որ այդ հանդիպումներում քրդերը կարող են ռազմական օգնության խնդրանքով դիմել Իսրայելին՝ ներառյալ սպառազինության մատակարարումը։
Լիբերմանի «արձագանքման պլանի» վերջին փուլը Անկարայի վրա դիվանագիտական հարձակումն է, որի շրջանակներում համայն աշխարհի իսրայելական դիվանագիտական առաքելությունները զեկուցելու են Թուրքիայի կողմից նրա տարածքում փոքրամասնությունների (մարդու) իրավունքների ցանկացած խախտման մասին։
Հիշեցնենք, որ Ավիգդոր Լիբերմանը Թուրքիայից Իսրայելի ներողություն խնդրելու կատաղի հակառակորդն է։
