Թուրքական Doğan լրատվական գործակալության փոխանցմամբ՝ Թուրքիայում ահաբեկչական հռչակված և արգելված Քրդստանի աշխատավորական կուսակցության (PKK) զինյալները հարձակվել են Էրզրումի Հընըս շրջանի ոստիկանատան վրա։ PKK 7 կամ 9 զինյալներ 2 ձեռքի նռնակ են նետել ոստիկանատան բակ։
Ոստիկանները պատասխան կրակ են բացել նրանց վրա և վիրավորել երկու զինյալի,որից հետո նրանք փախուստի են դիմել։ Ապա Էրզրումի նահանգի անվտանգության ուժերը նրանց հայտնաբերելու համար ձեռնարկել են լայնամասշտաբ որոնողական աշխատանքներ։
Իսկ Վանի նահանգի Գյուրփընար շրջանի կենտրոնում PKK 4 զինյալներ կրակ են բացել ոստիկանական մեքենայի վրա։ Նշվում է, որ ժամը 01.00-ին քուրդ զինյալները տաքսի են նստել, ապա տեսնելով դիմացից եկող ոստիկանական մեքենան՝ դիմահար կրակ են բացել նրա վրա։ Մոտ կես ժամ տևած փոխհրաձգության արդյունքում վիրավորվել է 2 ոստիկան, որից հետո քուրդ զինյալները փախուստի են դիմել։
Հիշեցնենք, որ վերջին շրջանում թուրքական բանակի՝ PKK-ի գործոնով պայմանավորված կորուստների ավելացումից հետո թուրքական իշխանությունները վճռեցին ահաբեկչության (PKK-ի) դեմ պայքարում ներառել նաև թուրքական ոստիկանությանը։
