Համացանցում տարածվել է տեսանյութ, որն արվել է գաղտնի՝ ՌԴ զինկոմիսարիատներից մեկում: Տեսանյութում պատկերված է, թե ինչպես են զինկոմիսարիատում ստիպում, որ ՀՀ քաղաքացին, որը չի հանդիսանում ՌԴ քաղաքացի, մեկնի պատերազմ: «Ընտանիքով եկել եք, աշխատատեղեր եք զբաղեցնում, իսկ հենց պետությունը ձեր կարիքն ունի, փախչում եք: Ձեզնից ի՞նչ տղամարդ»,- ասում է զինկոմիսարիատի աշխատակիցը:
Տղամարդը հակադարձում է, որ ինքը ՌԴ քաղաքացի չէ, սակայն ստանում է հետևյալ պատասխանը. «Ի՞նչ կապ ունի, դուք այստեղ եք ապրում, ձեր կինն ու երեխաներն այստեղ են, ուրեմն գրեթե քաղաքացի եք»: Տղամարդուն նաև սպառնում են, որ հրաժարվելու դեպքում կվարվեն օրենքի ողջ խստությամբ։
Այս առնչությամբ՝ ռուսաստանցի հայ փաստաբան հայ-ռուսական իրավաբանների «ԱրմՌոսս» ասոցիացիայի նախագահ Ռուբեն Կիրակոսյանը «Առաջին լրատվական»-ի հետ զրույցում նշեց, որ նախկինում եղել են այդպիսի ահազանգեր, բայց հիմա նման բողոքներ իրենք չեն ստացել. «Հիմա ավելի կազմակերպված է այդ ամենն արվում, փորձում են այնպես անել, որ մարդիկ կամավոր դիմեն ու գնան: Մեծ արտոնություններ են առաջարկում սոցիալական պաշտպանություն ընտանիքին և այլն»,-ասաց նա:
Կիրակոսյանը նշեց, որ նախկինում մի քանի դեպքեր եղել են, որ ՀՀ քաղաքացիներին փորձել են անօրինական կերպով հավաքագրել, այդ թվում՝ սպառնալով. «Նրանք մեր օգնությամբ դիմել են դեսպանատուն, որ այդ հարցերը քննարկվեն ԱԳՆ-ի միջոցով: Դրանք եզակի դեպքեր են եղել առաջին մոբիլիզացիայի ժամանակ: Այն էլ այն մարդիկ էին, որոնք այստեղ ունեին օրենքի հետ խնդիրներ, հանցանք, դատվածություն և այդ առիթով զինկոմիսարիատների աշխատակիցները փորձել են այդկերպ իրենց պլանը կատարել: Այնպես չէ, որ դա քաղաքականություն է եղել կամ զանգվածային բնույթ է կրել»,- ընդգծեց փաստաբանը՝ հավելելով, որ այս պահին մոբիլիզացիա Ռուսաստանում դեռևս չկա:
Հարցին, թե ինչ կարող է անել քաղաքացին, եթե իրեն փորձում են անօրինական կերպով հավաքագրել, Ռուբեն Կիրակոսյանը պատասխանեց. «Եթե անօրինականություն է տեղի ունեցել, քաղաքացին պետք է դիմի դատարան, և այդ դեպքում վարույթը կանգ է առնում, մինչև դատական ատյանը այդ հարցը չքննի ու չորոշի՝ կա՞ն զորահավաքի հիմքեր, թե ոչ տվյալ քաղաքացու վերաբերյալ: Այդտեղ կան տարիքային առողջական պահանջներ, քաղաքացի է, թե ոչ, կամավոր է, թե ոչ և այլն»:
