Ինչպես երեկ տեղեկացրել էինք՝ Գլխավոր դատախազի ստորագրությամբ գրություններ են ուղարկվել ԵԱՀԿ երեւանյան գրասենյակի ղեկավարին, Եվրախորհրդի գլխավոր քարտուղարի Հայաստանում հատուկ ներկայացուցչին, Եվրախորհրդի խորհրդարանական վեհաժողովի մոնիթորինգի հանձնաժողովի համազեկուցող Պրեսկոտին, Եվրախորհրդի մարդու իրավունքների հանձնակատար Թոմաս Համմարբերգին, Հայաստանում ՄԱԿ-ի մշտական ներկայացուցչին` youtube կայքում տեղադրված մի տեսանյութի փորձաքննությունն արտերկրում կատարելու համար մասնագետներ առաջարկելու խնդրանքով:
Այսօր զրուցեցինք Մարտի 1-ին սպանված Տիգրան Խաչատրյանի մոր՝ Ալլա Հովհաննիսյանի հետ՝ հասկանալու համար, թե նրանք բացահայտման այս ուղղությամբ ինչ հույսեր ունեն:
Նրա խոսքով՝ երբ այսօր քնից արթնացել է, իր մոտ տպավորություն է ստեղծվել, թե բոլորի կողմից Մարտի 1-ը մոռացվել է, եւ այդ վիշտը շարունակում է հուզել միայն սպանվածների հարազատներին:Այլ հարց է, որ նրանք ոչ մի կերպ չեն կարողանում հասնել նրան, որ մեղավորները պատժվեն:
«Այսօր լրանում է Մարտի 1-ի 3.5 տարին եւ չէի մտածում, որ այս տարիների ընթացքում այս վիճակը կլինի: Ոչինչ չի բացահայտվի: Դատախազը հերթական հայտարարությունն է տարածել: Եթե իրոք այդ հայտարարությունը ճիշտ է, եւ արտասահմանյան փորձագետներ կան, կզբաղվեն սպանությունների բացահայտման գործով : Չնայած ես կարծում եմ, որ այդ իշխանավորները այնքան խորամանկ գտնվեցին, որ 3.5 տարի կոծկեցին։
Բայց ամեն դեպքում որոշ սպանություններ արտասահմանյան փորձագետները կբացահայտեն: Օրինակ, Չերյոմուխայից զոհվածները, որոնք ոստիկաններ են, ինձ թվում է՝ նրանց կարելի է հայտնաբերել: Բայց նորից եմ կրկնում, որ 3.5 տարին բավական ժամանակ է այդ ամենը կոծկելու համար: Կարծում եմ, որ այդ հայտարարության արդյունքում մի բան կանեն, որ չգան այդ մարդիկ կամ ինչ-որ ձեւերով նրանց աշխատանքը կխոչընդոտեն եւ չեն թողնի, որ նրանք իրականում աշխատեն»,- նշեց տիկին Ալլան:
Նրա խոսքով՝ եթե արտասահմանյան փորձագետները գան եւ փաստահավաք խմբի անդամների հետ աշխատեն, Անդրանիկ Քոչարյանի հավաքած նյութերից օգտվեն, բացահայտումներ կլինեն:
«Բայց նորից եմ կրկնում, ինչպես այն երկխոսությանը չէի հավատում, այնպես էլ այս իշխանության ոչ մի քայլին»,- եզրափակեց տիկին Ալլան: